Búgin, 13 sáýirde Astana áýejaıynyń mańynda qurǵaq shóp pen qamys órtene bastady, birneshe saǵat ótse de, tilsiz jaý áli aýyzdyqtalǵan joq. Oqıǵa orynyna Astana qalasy tótenshe jaǵdaılar departamentiniń 40 adamy men 5 tehnıkasy jumyldyrylǵan, dep habarlaıdy Egemen.kz.
Qalalyq TJD usynǵan málimet boıynsha, oqıǵa ornynda jedel shtab quryldy.
«14:30-daǵy jaǵdaı boıynsha qurǵaq shóp pen qamystyń órtený aýmaǵy shamamen 3 gektarǵa jetti. Qazirgi ýaqytta Astana qalasy TJD jeke quramynyń 40 adamy men 5 tehnıkasy, sondaı-aq ákimdiktiń 4 sýarý jýý mashınalary órtti sóndirip jatyr», delingen aqparattyq habarlamada.Vedomstvo ókilderi qaza tapqandar men zardap shekkender joq ekenin qosa habarlady.
«О́rttiń sebebi aldaǵy ýaqytta anyqtalady. Ekpindi jel men qurǵaq shóp órt sóndirý jumystaryna qıyndyq keltirip jatyr», dedi TJD ókilderi.Aıta ketsek, órt áýe aılaǵynyń qyzmetine áser etpegen. Astana áýejaıy shtattyq rejımde jumys istep tur.