Keıde men ózime qazaqstandyqtardyń basyn biriktiretin eń basty faktor qaısysy degen saýal qoıamyn da, oǵan únemi birden-bir anyq jaýap tabamyn. Ol – Tuńǵysh Prezıdentimiz. Onyń Qazaqstan tarıhyndaǵy da, sondaı-aq, asyra aıtqanym emes, barsha adamzattyń tarıhyndaǵy da orny asa zor.
Nursultan Ábishulynyń týǵan kúni onyń basshylyǵymen qol jetkenimizdiń bárin taǵy bir baǵalaýǵa jáne árıne, Elbasymyz týraly oı tolǵaýǵa túrtki bolary haq.
Elbasymyzben árbir kezdesýim meniń jadymda jaqsy saqtalyp qaldy. Nursultan Ábishuly bizdiń kommandıttik seriktestigimizdiń alqaptarynda birneshe márte boldy, mal fermalaryn da aralap, sharýashylyqpen tanysty.
Al, osynyń bári úlken qıynshylyqtarǵa uryndyrǵan 90-shy jyldary bastalǵan-dy. Bul quldyraý men aqsha tapshylyǵynyń kezi edi. Barlyq ekonomıkalyq baılanystar úzilgen. Buǵan deıin biz josparly ekonomıkaǵa súıenip jumys istep, joǵarydan nusqaý kútip daǵdylanǵan edik. Kenetten bizge oılamaǵan erkindik tıip, “О́mir súrgiń kelse, qımyldaı bil!” degen qaǵıdaǵa tap boldyq. Mine, naq osy kúrdeli de kúrmeýi qıyn ýaqytta Nursultan Nazarbaev elimizdiń Prezıdenti bolyp saılandy. Ol sonda ózine tán úlken batyldyqpen jáne sheshimdilikpen qazynasy jutaǵan memlekettiń tizginin qolyna aldy. Men osy adamnyń kásiporyndarǵa qaıtadan jan bitirgen, jumys oryndary ashylǵan reformalardy qalaı tamasha júrgize alǵanyna áli kúnge tańǵalamyn.
Bizder, qazaqstandyqtar, Elbasynyń barlyq aqyl-keńesterin isimizge nusqaý retinde qabyldadyq. Búkil memleketti, sonyń ishinde, árıne, agrarlyq salany da reformalaý bastaldy. Osynaý jańǵyrtýlar búkil qazaqstandyqtardy qamtyǵanymen, jer-jerde ártúrli atqaryldy. Keı jerlerde keńsharlar ydyratylyp, shaǵyn sharýashylyqtarǵa bólinip ketti. Al, keıbireýler durys baǵyt taýyp, qolda bardy saqtap qaldy. Biz bolsaq, ózimizdiń burynǵy “Novonıkolskıı” keńsharynda alǵashqy kezderi qaýymdastyq qurdyq. Mine, sol kezde bizdiń oblysymyzda bolǵan Prezıdent sharýashylyq júrgizýdiń bul túriniń burynǵy keńshardyń bir túri ekenin atap aıtty. Biz onyń eskertpesine birden qulaq asyp, kóp uzamaı kommandıttik seriktestik qurdyq.
Sol qıyn jyldary Nursultan Ábishuly adamdardan qıyndyqtardy esh jasyrmady, olarǵa úıip-tógip ýáde bermedi. Onyń “Biz sizderge jer berdik, sony paıdalanyńyzdar da, 3-4 jyl shydańyzdar. Sodan soń bári ońalady”, degen sózderi áli jadymda.
Prezıdentpen kezdesýler kóńilge úmit uıalatyp, boıǵa jylylyq darytyp otyrdy. Biz onyń seniminen shyǵýǵa tyrystyq. Áýelgide óz qarajatymyzǵa sútti qaǵaz qapshyqqa quıyp shyǵaratyn apparat satyp aldyq. Sodan keıin 2 press ornatyp, maı óndiretin boldyq. Odan ári jarma óndiretin jabdyqtar satyp aldyq. Keıinirek, aýylda dúken ashyp, taýarlardy aýyldastarymyzǵa eńbekaqy esebine berdik. Bir sózben aıtqanda, tirelgen tyǵyryqtan shyqtyq.
Prezıdent bizdiń sharýashylyǵymyzǵa taǵy bir sapary kezinde aýyl turǵyndarynan “Jaǵdaılaryńyz qalaı?”, – dep suraǵanda olardy bizdiń oblysymyz taratylmaı ma degen saýal ǵana tolǵandyrǵan edi. Odan basqa másele týyndamady. Jáne basqasha bolýy múmkin de emes edi. Nursultan Ábishuly sharýashylyqtyń damyp otyrǵanyn, adamdardyń laıyqty turmys quryp, jumys istep jatqanyn kórdi.
Men Elbasymen osy kezdesýge Novonıkolskiniń horyn shaqyrǵanym esimde. Oǵan qatysýshylardyń bári meniń belgi berýimdi tosyp, júgeri alqabynyń janynda turdy. Nursultan Ábishulyna aýyl turǵyndarynyń onymen kezdeskisi keletinin aıtqanymda bizdiń ártisterimiz aǵash ishinen qoldaryna gúl ustap, “Altyn alqap jaıqalǵanda” ánin shyrqap shyǵa keldi. Prezıdent te qýanyshty raı tanyta, olarǵa qarsy júrdi. Sosyn horǵa qosylyp, «Alqapqa jas agronom shyqqanda» ánin shyrqady.
Memleket basshysynyń bizdiń sharýashylyǵymyzǵa saparlarynyń biri kezinde “Men búgin ózimniń dosymmen kezdesip turmyn”, degen naǵyz janbaýrar sózderi esimde qaldy. Onyń sol jyly lebizi maǵan zor rýhanı qoldaý boldy. Elbasyna sol úshin zor alǵysymdy bildiremin.
Bizdiń Prezıdentimiz qalyptasqan jaǵdaıdy óte jaqsy biledi, alys bolashaqty da boljaı alady. Baǵdarlamalardy tamasha jasaıdy. Qarańyzdarshy, qandaı sáýletti Astanany salyp berdi. Men onymen úsh ret shetelderde saparlas boldym. О́zge memleketterdiń ókilderiniń oǵan qandaı qurmet bildiretinin maqtanyshpen aıta alamyn. Buǵan qol jetkizý ońaı emes. “Men – qazaqstandyqpyn” deseńiz, sheteldikterdiń “Á, Nazarbaev!” dep jaýap beretini odan beter súıindiredi. Munyń ózi Nursultan Nazarbaevtyń bizdiń Kóshbasshymyz ǵana emes, onyń bedelin búkil álem moıyndaǵanyn, ony qurmettep, aqyl-keńesine júginetinin bildirse kerek.
Buǵan qosa, agrarıı retinde meni onyń adamdarmen jaı ǵana sóılesip qoımaı, olardy tolǵandyratyn máselelerdi kóteretini súısindiredi. Nursultan Ábishuly bizdiń sharýashylyǵymyzǵa kelgen kezinde adamdarmen olarǵa túsinikti tilde sóılesti. О́ıtkeni, bizdiń Prezıdentimiz qarapaıym shańyraqtan shyqqan jáne ony ózi de jasyrmaıdy. Adamdar oǵan senedi. Al, biz onyń aıtqandaryn júzege asyrýǵa kúsh salamyz.
Endi, Elbasymyz Qazaqstandy álemniń barynsha damyǵan 30 memleketiniń qataryna engizý strategııasyn usynyp otyr. Bul – bıik te ıgi maqsat. Biz ony júzege asyrýǵa umtylýymyz kerek. Prezıdent buryn da, búgin de Qazaqstan myqty da gúldengen memleket bolýy úshin bárimiz tize qosa jumys istep, alǵa basýymyz kerektigin aıtyp keledi.
Men Nursultan Ábishulyna zor densaýlyq, árqashanda eldiń jáne búkil dúnıejúziniń saıası ómiriniń asqar bıiginde bolýyn tileımin.
Gennadıı ZENChENKO,
«Zenchenko jáne K» kommandıttik seriktestiginiń
bas dırektory, Qazaqstannyń Eńbek Eri.
Soltústik Qazaqstan oblysy.