ASTANA. 6 shilde. Búgin túnde Brazılıa qalasynda Argentına men Belgııa quramalary shırek fınalda kezdesip, bulardyń aldyńǵylary 1:0 esebimen utty. Bul týraly egemen.kz habarlady.
Munda da oıyn taǵdyry tez sheshildi. Belgııa quramasy chempıonattaǵy jolyn aıaqtady. Bálkim, áldekimde qazir quramy myqty sanalyp júrgen bul komandadan budan da joǵary tabys kútken shyǵar, biraq Argentına quramasy Mark Vılmots jigitteri joryǵynyń shyńy 1/4 fınal ekenin taıǵa tańba basqandaı etip tanytyp berdi.
Argentına – Belgııa 1:0 (1:0).
5 shilde. Brazılıa. Ulttyq stadıon. 68 551 kórermen. Tóreshi – Nıkola Rıssolı (Italııa).
Argentına: Serhıo Romero, Pablo Sabaleta, Esekel Garaı, Martın Demıchelıs, Hose Marııa Basanta, Lýkas Bılıa, Haver Maskerano, Anhel dı Marııa (Enso Peres, 33), Esekel Lavessı (Rodrıgo Palasıo, 71), Lıonel Messı, Gonsalo Igýaın (Fernando Gago, 81).
Belgııa: Tıbo Kýrtýa, Tobı Aldverveıreld, Vensan Kompanı, Danıel van Bıýıten, Iаn Vertongen, Aksel Vıtsel, Marýan Fellaını, Kevın Mıralıas (Drıs Mertens, 59), Kevın de Brıýıne, Eden Azar (Naser Shadlı, 76), Dıvok Orıgı (Romelý Lýkaký, 59).
Gol: Gonsalo Igýaın (8).
Eskertýler: Lýkas Bılıa (75) – Eden Azar (53), Tobı Aldverveıreld (68).
Argentına fýtbolshylary jeńiske ádil jetti. Belgııalyqtar olardan tómen ekenderin kórsetti. Olardyń oıǵa alǵan tirlikteriniń kóbi júzege aspaı jatty. Komandanyń beldi oıynshylary qatarynan Eden Azar kórinbeı qaldy, Dıvok Orıgıdi Esekel Garaı men Martın Demıchelıs typyr etkizbeı tastady, Kevın Mıralıastiń qımylynan asa kóp paıda bolǵan joq. Al ekinshi taımda alańǵa shyqqan Romelý Lýkaký men Drıs Mertens oıyndy biraz qyzdyrǵanlarymen, bul tarazy basyn ózderine qaraı aýdaryp jiberýge qaýqarsyz boldy.
Belgııalyqtardyń qazir kóńildi demdeıtin bir ǵana nárseleri bar: eger onyń quramyndaǵy jas jigitter sheberlikterin budan da arttyra túsetin bolsa, 2016 jyly Fransııada ótetin Eýropa chempıonatynda olar talaıdy taptap ótedi. Sol kezde biz «qyzyl perilerdi» Fransııa men Germanııa qatarynda osy týrnırdiń favorıti sanaı alamyz. Endi argentınalyqtarǵa kelsek, olar taǵy da esten tandyrarlyqtaı tamasha oıyn kórsete alǵan joq, biraq ózine kerekti nátıjege qol jetkizip, ony saqtap qaldy. «Albıseleste» birinshi kezekte óziniń qorǵanys shebine qattyraq kóńil bóle otyryp, barynsha túsinikti oınady. Ol shabýylda kez kelgen ýaqytta jarylys jasaı alatyn Lıonel Messı men onyń áriptesteriniń qolaıly sátti tıimdi paıdalanyp ketetin áreketterine súıendi. Negizinde osy nátıje berdi. Kezdesýdiń 8-mınýtynda Gonsalo Igýaın sondaı sátte esep ashyp ketti.
Komandalar oıyndy sergek bastady. Qaqpa aldyndaǵy qaýipti jaǵdaı da kóp kúttirgen joq. Messı alańnyń qaq ortasynda turyp, sol qaptalda ashyq turǵan Esekel Lavessıdi taýyp aldy. Osydan keıin Esekel dopty qaqpaǵa qaraı kólbeı jóneltti. Biraq jolaı qorǵaýshylar qaǵyp qaıtardy. Sodan keıin Anhel dı Marııa oıyn tizginin óz qolyna alyp, aıyp alańyna jaryp kirdi. Biraq onyń urǵan dobyn taǵy qorǵýshylar qaıtardy. Osydan keıin dopqa egelik etken Messı ózin ańdyǵan eki oıynshydan sytylyp shyǵyp, dı Marııaǵa qaıta dop berdi. Onyń Pablo Sabaletaǵa pasyn qorǵaýshy qıyp jiberdi. Áıtkenmen, dop sol boıy Igýaınnyń aıaǵyna baryp sart etti. Gol!
Soǵylǵan goldan keıin argentınalyqtar shabýyldaryn jalǵastyra berdi. Biraq odan endi qaıta nátıje shyqqan joq. Al belgııalyqtar oıyn sońyna deıin aıqasyp baqty.
Damır Qojamqul.
Derekkóz: egemen.kz.
Foto: Sportbox.ru.