Memleket basshysy Qasym-Jomart Toqaev VIII saılanǵan Parlamenttiń birinshi sessııasynda el damýyna úles qosatyn birneshe mańyzdy máseleni erekshe atap ótti. Sonyń ishinde Úkimet pen Parlamentke týrızmdi damytý máselesine basa nazar aýdarýǵa tıis ekenin jetkizdi.
Prezıdentimiz óz sózinde «Elimizdegi týrızmniń áleýeti zor, kórikti jerlerimiz óte kóp. Biraq sol jerlerge baryp demalýǵa áli de jurttyń qoly jete bermeıdi. Bul salaǵa tyń serpin berý úshin, eń aldymen, ınfraqurylym máselesin keshendi túrde sheship, qyzmet sapasyn túbegeıli jaqsartý qajet», dep málimdedi.
Búginde týrızm salasy memleketke eń kóp tabys alyp keletin birden-bir sala ekeni barshaǵa belgili. Sondyqtan da Memleket basshysy elimizdegi týrızm salasyn damytýǵa erekshe toqtalyp ótti. Qazirgi tańda Qazaqstan týrızmi álemdi sharpyǵan pandemııaǵa deıingi qalpyna kelip úlgerdi. Ishki jáne kelý týrızminiń, kórsetilgen qyzmetter kóleminiń jáne nómirlik qordyń negizgi kórsetkishteri óskeni baıqalady.
Qazaqstan Dúnıejúzilik ekonomıkalyq forýmnyń álemdik týrızm reıtinginde pozısııasyn jaqsartyp, 117 el arasynda 66-orynǵa turaqtady. Árıne, týrıster sanyn ulǵaıtý úshin tıisti ınfraqurylym salý jáne qolaıly jaǵdaı jasaý qajet. Keıingi jyldary bul baǵytta aıtarlyqtaı jumystar atqarylyp keledi.
2019-2022 jyldary elimizde 118 ınfraqurylymdyq jobalardy iske asyrýǵa 170,1 mlrd teńge kóleminde qarjy bólindi. Búginde jalpy quny 789,6 mlrd teńgeni quraıtyn 197 joba iske asyrylyp jatyr: kólik ınfraqurylymy boıynsha – 371,9 mlrd teńgege 95 joba, aýmaqtardy abattandyrý boıynsha – 229,8 mlrd teńgege 47 joba, sýmen jabdyqtaý, sý burý jáne káriz boıynsha – 84,7 mlrd teńgege 29 joba, elektrmen jáne jylýmen jabdyqtaý boıynsha – 103,2 mlrd teńgege 26 joba. Sonymen qatar týrıstik keshbek sııaqty memlekettik qoldaýdyń jańa sharalary ázirlenip jatyr.
Jalpy, joǵaryda atalǵan bastamalardy sapaly iske asyrý týrıstiń búkil jol boıyndaǵy jaılylyǵyn qamtamasyz etedi.
Talǵat AMANBAEV,
«Kazakh Tourism» ulttyq kompanııasy»
aksıonerlik qoǵamy basqarma tóraǵasy