Keshegi ótken paneldik otyrystar Assambleıanyń tyńnan túleýge, jańasha jumys isteýge umtylysyn kelisti kórsetip berdi. Tolǵaǵy jetken máselelerdi ashyq aıtyp, qıyn túıinderdi shıelenbeı turyp tarqatý ǵana tyǵyryqqa tirelýden saqtaı alady.
Ǵalymdar etnostyq qatynastarda aldan shyǵyp turatyn mynandaı máselelerge nazar aýdarady: etnostyq jáne aýmaqtyq shekaralardyń úılespeýi, ekonomıkalyq ahýaldyń nasharlaýy, áleýmettik qaıshylyqtar, memleket saıasaty deńgeıine kóterilgen ksenofobııa men ulttyq astamshylyq, ulttyq jáne dinı alaýyzdyq, tarıh tereńinen tamyr tartatyn ókpe-renish. Osylardyń ishinde bizdiń elimizge naqty qatysty bola alatyny – ekonomıkalyq ahýaldyń nasharlaýy men áleýmettik qaıshylyqtar. Munyń ekeýiniń ózi de jalpy jurttyń júıkesin juqartýǵa jetip jatyr.
Ondaıda adam kinálilerdi izdeýge, tabýǵa tyrysýǵa beıim turady. Sondyqtan da birlik, dostyq, tatýlyq, jarastyq, kelisim qaı kezde de kerek, al qazirgideı dún-dúnıe dúrligip, elimiz jan-jaqtan qaýmalaǵan qyspaqtar qursaýynda turǵanda, syrtqy faktorlar ishki ahýalǵa áser etpeı qoımaıtyn shaqta olar tipti kerek, aýadaı kerek.
Tynyshtyq, tatýlyq saqtalsa, bári de bolady. Búgin bolmasa, erteń bolady. Tynyshtyq, tatýlyq saqtalmasa, onyń bári de bolmaıdy. Búgin turmaq, erteń de bolmaıdy. Osyny umytpaıyqshy. Eldiktiń bul uly mindetinde Assambleıa atqarar mıssııa asa aýqymdy.
Saýytbek ABDRAHMANOV,
qoǵam qaıratkeri, Memlekettik syılyqtyń laýreaty