Aqtóbelik iri kásiporyndar kolledjderge sheftik kómek kórsetý úrdisin qalyptastyrýda. Alǵashqylardyń qatarynda «Aqtóbe hrom qosyndylary zaýyty» AQ pen «Servıs ı K» JShS Aqtóbe tehnıkalyq kolledjimen kelisimshartqa qol qoıdy. Kelisimshart aıasynda kolledj oqýshylary kásiporyndarǵa baryp, ózderine bekitilgen tálimgerlerdiń basshylyǵymen óndiristik tájirıbeden ótedi. Budan basqa arnaýly pándik oqytýshylardy kásiporynda kásibı biliktiligin arttyrý tájirıbesinen ótkizý de qaralǵan.
– Oqytýshylardyń óndiriste kásibı biliktiligin arttyrý boıynsha tájirıbeden ótýi óte mańyzdy. Olar óndiristegi barlyq tehnologııany taldap, zertteıdi, sonan soń oqýshylarǵa kásibı bilim beredi. Qazir kolledj túlekterin jumysqa qabyldaýǵa ázir kásiporyndarǵa mamandar daıarlaýǵa aıryqsha mańyz beriledi. Keıin kolledj túlekteriniń bilimin attestattaıtyn komıssııa músheleriniń 75 paıyzy jumys berýshiler bolady. Iаǵnı, olar attestattaý kezinde-aq ózderine qajetti kadrlardy tańdap ala alady. Biz bul baǵyttaǵy jumysty alda da jandandyra túsemiz. Aımaqtaǵy iri kásiporyndardy oqý oryndaryna bekitýdiń mehanızmderin qarastyramyz, –deıdi Aqtóbe oblystyq kásipkerler palatasynyń saraptamashysy Venera Shavkılova.
Onyń aıtýynsha, «Aqtóbe hrom qosyndylary zaýyty» AQ elektrıkterdi tájirıbeden ótkizip, keıin jumysqa qabyldaýǵa yntaly bolsa, «Servıs ı K» JShS avtomobıl kólikteriniń tehnık-mehanıkterine jáne mehanık-dıagnostıkterine zárý kórinedi. Sondaı-aq, bul kásiporyndar kelisimshart aıasynda kolledjdiń materıaldyq bazasyn arnaýly qondyrǵylarmen jaraqtandyrýǵa qoldan kelgeninshe kómektesetin bolady.
Satybaldy SÁÝIRBAI,
«Egemen Qazaqstan».
Aqtóbe oblysy.