Elimizde ınflıasııa kórsetkishi jyldyq mánde qatarynan ekinshi aı baıaýlap, sáýirde 16,8 paıyz boldy. Buǵan deıin aqpanda – 21,3, al naýryzda – 18,1 paıyz bolǵan edi. Jyldyq mánde azyq-túlik taýarlarynyń baǵasy – 17,9 paıyz, azyq-túlikke jatpaıtyn taýarlar – 18,2 paıyz, aqyly qyzmetter 13,7 paıyzǵa ósti.
2022 jylǵy sáýirmen salystyrǵanda keńse taýarlary – 68,5, kir sabyn – 59,3, shaqpaq qant – 51,7, ydys jýýǵa arnalǵan quraldar – 51,6, qııar – 50,9, balalar sabyny – 49,6, kúrish – 43,9, kir jýý untaǵy – 43, dárethana qaǵazy 42,7 paıyzǵa qymbattaǵan. Jyldyq mánde, kerisinshe, qyryqqabat – 53,4, sábiz 19,2 paıyzǵa arzandady.
«Inflıasııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Tutyný baǵalarynyń ındeksin esepteý kezinde paıdalanylatyn taýarlar men qyzmetter sebeti 508 taýar men qyzmetten turady, munda 160 – azyq-túlik taýarlary, 243 – azyq-túlikke jatpaıtyn taýarlar jáne 105 – aqyly qyzmetter. Baǵalardy tirkeý barlyq oblys ortalyǵynda, astanada jáne qalalar men aýdan ortalyqtarynda ártúrli menshik nysanyndaǵy saýda jáne qyzmet kórsetý kásiporyndarynyń iriktemeli jelisi boıynsha júrgiziledi», dep túsindiredi Ulttyq statıstıka bıýrosynyń baǵa statıstıkasy departamentiniń dırektory Qýanyshbek Jaqypbekuly.
Azyq-túlik taýarlary arasynda jemis pen kókónis baǵasy edáýir qymbattaǵan: sáýirde qyryqqabat – 4,7 paıyz, qyzanaq – 4,1 paıyz, júzim – 3 paıyz, alma – 2,6 paıyz, almurt – 2,4 paıyzǵa qymbattaǵan. Baǵanyń ósýi kúrishke – 2,7 paıyz, salqyndatylǵan sýsyndarǵa – 2,5 paıyz, rojkılerge, ýltrapasterlengen sútke – árqaısysy 2,4 paıyzdan, salqyndatylǵan balyqqa – 2,2 paıyz, pasterlengen sút, makaron ónimderine – árqaısysy 2,1 paıyzdan baıqaldy. Bul rette qııar – 11,4 paıyz, qaraqumyq jarmasy – 3,7 paıyz, kúnbaǵys maıy 2,6 paıyzǵa arzandady.
«Qyzmet kórsetý boıynsha baǵalardyń ósýi jolaýshylar áýe kóliginde baıqaldy, bir aıdyń ishinde ushý qyzmeti 17,7 paıyzǵa qymbattady. Baǵanyń joǵarylaýy shashtaraz ben sulýlyq salondarynda – 1,5 paıyz, jerleýge baılanysty salt-jora jasaý qyzmetterinde – 1 paıyz bolyp tirkeldi. Sanatorıı qyzmetteri – 1,1 paıyz, densaýlyq saqtaý qyzmetteri 0,9 paıyzǵa qymbattaǵan. О́ńirler arasynda eń joǵary aılyq ınflıasııa Abaı jáne Ulytaý oblystarynda – árqaısysynda 1,4 paıyzdan (ortasha respýblıkalyq deńgeıden 0,5 paıyzdyq tarmaqqa joǵary), eń tómengi Astana qalasynda tirkeldi – 0,5 paıyz», dep habarlaıdy Ulttyq statıstıka bıýrosy.