2022 jylǵy jańa reglamentke saı Úndistan, Iran jáne Qytaı azamattary Qazaqstanǵa shekarany asqan kezden bastap 14 kúnge iskerlik, jeke jáne týrıstik maqsattarda vızasyz kire alatyn boldy. Bul tek birjaqty baǵytta edi, ıaǵnı Qazaqstan azamattaryna atalǵan elderge barý úshin vıza rásimdeý talap etiletin. Endi Qytaı elimen arada 30 kúnge deıingi ekijaqty vızasyz rejim ornatylyp, azamattarymyz da Qytaıǵa kirý úshin vıza rásimdeıdi. Bul jerde aıta ketý kerek, vızasyz rejim sheńberinde sheteldikterge el aýmaǵynda eńbekpen nemese tólenetin qyzmetpen aınalysýǵa tyıym salynady. Sonymen birge montajdaý jáne jóndeý jumystarymen de aınalysýǵa bolmaıdy, ol úshin vıza talap etiledi.
Ekonomıkalyq turǵydan eki el arasyndaǵy vızasyz rejim iskerlik ortalardyń ózara is-árekettestik deńgeıin kóterýge jáne shetel ınvestorlary úshin qolaıly jaǵdaı qalyptastyrýǵa paıdaly. Ulttyq banktiń dereginshe, 2023 jyldyń 1 qańtaryndaǵy jaǵdaı boıynsha Qazaqstanǵa tartylǵan shetel ınvestısııalary arasynda Qytaı Nıderland, AQSh jáne Shveısarııadan keıingi 4-orynda (23,2 mlrd dollar) tur.
Endi sınofobııa týraly aıtar bolsaq, Qytaı óziniń uzaq ǵasyrlyq tarıhynda shapqynshylyq emes, jaýdan qorǵaný úshin kóp soǵysqan. Máselen, mońǵol shapqynshylyǵyn, HH ǵasyrdaǵy japon qyrǵynyn aıtsaq jetkilikti. Qazirgi kúni Qazaqstan eki alyp derjava arasyndaǵy tarıhı-geografııalyq, geosaıası arenada ornalasqan. Biz bul jaǵdaıdy ózgerte almaımyz, kerisinshe odan ózimizge paıdaly jaqtaryn izdeýimiz kerek.
Qytaı – búginde álemniń ekinshi ekonomıkasy. Qasymyzda osyndaı damyǵan eldiń bolýy biz úshin bir jaǵynan úlken paıda. Elimizde kóbirek Qytaıdy zertteý ortalyqtaryn ashyp, zertteýler júrgizip, elimizdiń múddelerin qorǵaý sheńberinde tıimdi sheshimder qabyldasaq, ózara vızasyz rejimnen kelip-keter qaýip joq dep aıta alamyz.
Qazbek MAIGELDINOV,
saıasattanýshy