Sátbaev qalasynda ári aqyn, ári kompozıtor Taıjan Qalmaǵambetulynyń ánderin oryndaýshylardyń respýblıkalyq baıqaýy ótti. Sátbaev qalasynyń 50 jyldyǵy aıasynda, bıyl úshinshi márte ótkizilgen baıqaýdy Ulytaý oblysynyń Mádenıet, tilderdi damytý jáne arhıv isi basqarmasy men Sátbaev qalasynyń ákimdigi uıymdastyrdy.
«Jigitpin naǵashydan baǵy janǵan» dep ózi jyrlaǵandaı, Taıjan Qalmaǵambetuly – ataqty kompozıtor Úkili Ybyraıdyń týǵan jıeni. Ol – Syr boıynyń sańlaǵy Nartaı Bekejanovtyń ustazy.
Taıjan 1936 jylǵy Máskeýde ótken Qazaqstan mádenıeti men óneriniń onkúndigin ashý qurmetine bólengen. Sonymen qatar jappaı qýǵyn-súrgin qurbanyna aınalyp, «halyq jaýy» retinde atylyp ketken taýqymetti taǵdyr ıesi. Onyń shyǵarmashylyǵy, án murasy bertinge deıin halyqtan jasyryn ustaldy.
Bir-birimen ushtasyp jatqan ánshilik mektepterdiń sabaqtastyǵyn, úndestigin nasıhattaý maqsatynda elimizdiń ár shalǵaıynan kelip, baq synaǵan 28 ónerpaz Taıjan ánderimen qosa Úkili Ybyraıdyń, Nartaı Bekejanovtyń ánderin de oryndady.
Baıqaýǵa Qatımolla Berdiǵalıev, Almas Almatov, Ǵalym Muhamedın, Jaqsykeldi Kemalov, Amankeldi Kúzeýbaev, Dárigúl Elamanova synda ulttyq ónerdiń maıtalmandary qazylyq etti.
Baby kelip, baǵy janǵan Beksultan Baraqbaıdyń óneri bas júldege laıyq dep tabyldy. Sátbaev qalasynyń ákimi Sh.Áýbákir oǵan 1 mln teńgeniń sertıfıkatyn tapsyrdy. Tolqynaı Muhambetjan – birinshi, Jandos Syzdyqov – ekinshi, Nurtilek Aqtaev úshinshi oryn ıelense, Nurbolat Uzaqbaıǵa Ulytaý oblystyq T.Qalmaǵambetov atyndaǵy fılarmonııanyń arnaıy júldesi berildi.
Taıjan aqyn urpaqtary taǵaıyndaǵan arnaıy júldeler Almagúl Qarataevaǵa, Bekarys Kóshtaevqa,Tańat Muqyshevqa buıyrdy.
Ulytaý oblysy,
Sátbaev qalasy