Túrkistan oblysynan Ekinshi dúnıejúzilik soǵysqa 140 myńnan astam azamat attanyp, onyń 70 myńy elge oralǵan. Bıylǵy 25 sáýirdegi jaǵdaı boıynsha 4438 adam soǵys ardagerleri men oǵan teńestirilgender esebinde. Onyń ishinde Ekinshi dúnıejúzilik soǵystyń 14 ardageri bar.
Oblys basshylyǵy árbir ardagerdiń úıinde bolyp, merekemen quttyqtady. О́ńirdegi ardagerlerdiń eń jasy úlkeni 102-de. Ekinshi dúnıejúzilik soǵystyń Tólebı aýdanyndaǵy jalǵyz kýágeri 102 jastaǵy Rysmet Jumaǵulov Leńgir qalasynda dúnıege kelgen. Qara jumysqa erte aralasyp, Georgıevka ujymsharynda eńbek etken. Qan maıdanǵa 1942-1943 jyldary qatysyp, Stalıngradty qorǵaýshylar qatarynda bolǵan. Al 1945-1974 jyldar aralyǵynda kúzet bóliminde qaraýyl jáne qosalqy sharýashylyqta jumysshy bolǵan. Fosfor zaýytynda zeınetkerlikke shyqqansha eńbek etken Rysmet Jumaǵulov «Otan soǵysy» ordenimen, «G.K.Jýkov» merekelik medalimen marapattalǵan. Rysmet qarııanyń zamandasy 101 jastaǵy Nemet Abdrasılov 1-gvardııalyq artıllerııalyq dıvızııa quramynda nysanashy, zeńbirek komandıri boldy. Stalıngrad, Kýrsk, Ýkraına, Belorýssııa, Polsha qalalaryn azat etýge qatysqan. Reıhstagqa shabýyl jasaý kezindegi erligi men batyrlyǵy úshin II dárejeli «Dańq» ordenimen marapattaldy. Sondaı-aq ol «Qyzyl Juldyz», I dárejeli «Dańq», I dárejeli «Otan soǵysy» ordenderimen, «Erligi úshin» jáne basqa da 24 medalmen marapattalǵan. Soǵys aıaqtalǵan soń Túrkistan qalalyq mılısııasynda jáne Túrkistan qalasynyń avtobazasynda júrgizýshi bolyp jumys istedi. Ardager 5 ul, 1 qyz, 20 nemere men 18 shóbere tárbıelep ósirdi.
Jalpy, oblysta 4438 ardagerge Jeńis merekesiniń qurmetine bir rettik materıaldyq kómek tóleý úshin aýdandyq, qalalyq bıýdjet esebinen 175,5 mln teńge bólingen. Soǵys ardagerlerine 1,5 mln teńgeden úlestirilse, 4400-den astam tyl eńbekkerleri men qaza bolǵan jaýyngerdiń jesirlerine jáne basqa da sanattardaǵy ardagerlerge qarjylaı kómek qarastyrylǵan.
Túrkistan oblysy