Ardagerlerge qurmet

Elordamyzdaǵy Ekin­shi­ dúnıe­júzilik soǵys jaýyn­ger­lerine arnalǵan monýmentaldy keshenge gúl shoqtaryn qoıý rásimine Qorǵanys mınıstri, general-polkovnık Rýslan Jaqsylyqov qatysty. Qaza tapqan batyrlar erligine qurmet kórsetý úshin monýmentke Qorǵanys mınıstrliginiń basshylyǵy, Aqmola garnızonynyń áskerı qyzmetshileri, Qarýly kúshter men soǵys ardagerleri, tyl eńbekkerleri, «Jas sarbaz» balalar-jasóspirimder áskerı-patrıottyq qozǵalysynyń tárbıelenýshileri keldi. Is-sharaǵa qatysýshylar qaza tapqan batyrlardy bir mınýt únsizdikpen eske aldy. Rásim sońynda Qorǵanys mınıstri, general-polkovnık Rýslan Jaqsylyqov jınalǵandardy Jeńis kúnimen quttyqtady.

– Bul mereke – álemdi fashızmnen qorǵap qalǵan aǵa býynnyń erligin eske alyp, rızashylyq bildiretin kún. Búgingi urpaq beıbitshiliktiń qadirin sezinip, birlik pen yntymaqty saqtaýǵa úlesin qossa, el erteńi jarqyn, keleshegimiz kemel bolary sózsiz, – dedi mınıstr.

Qazir elimizde 222 soǵys arda­ge­ri bar bolsa, solardyń 9-y Taraz qalasynda turady. Mereke qarsańynda óńirlik garnızon qyzmetshileri árbir ardagerdiń úıine baryp, syı-syıapattaryn tabystady. Olardyń shańyraqtaryna oblys ákimi Nurjan Nurjigitov te bas suqty.

Búginde maıdangerlerdiń bári de ǵasyr jasaǵan ata-ájeler. Soǵys bastalǵanda kámelet jasyna, ıaǵnı 18-ge tolǵan boz­bala­lardyń ózi bıyl 100-ge kele­di eken. Solardyń biri – Qara­ǵan­dy qalasynda turatyn 97 jas­ta­ǵy Ismagıl Galıýllın. Ol maı­danda áıgili T-34 tankisin aıdaǵan. Quttyqtaı kelgen Qara­ǵandy garnızonynyń áskeri qyz­metshilerine maıdanger 2014 jyly «Spassk» polıgonyna barǵany jaıynda aıtyp berdi. Sol kezdiń ózinde onyń jasy 88-de kelip qalsa da, qazirgi Qorǵanys mınıstriniń orynbasary, general Sultan Kamaletdınovpen birge T-72B tankisine otyryp, júrgizý normatıvterin «óte jaqsy» degen baǵaǵa oryndaǵanyn eske aldy.

Qonaev qalasynda jasy 103-ke­­ qaraǵan Oksana Betebaeva esimdi ardager turady. Búginde qalanyń qurmetti azamaty. Ol 1941 jyly 20 jasynda óz erkimen ásker qataryna suranyp, Shýıa qalasynyń áskerı gospıtalinde eńbek etipti. Qonaev garnızony áskerı polısııa bóliminiń áskerı qyzmetshileri onyń shańyraǵyna arnaıy baryp, merekemen qut­tyqtap qaıtty.

Almaty qalasynda turatyn 102 jastaǵy Adısh Ábdiraıymov ta bul kúni qurmetten kende qal­ǵan joq. Arda­ger­ 9 mamyrda­ dú­nıe­ge kelgen.­ Maıdanǵa attanǵan ol tutqynǵa túsip, Ger­manııadaǵy «Noıengamme» kons­la­gerinde otyrǵan. Almaty obly­sy­ Qarasaı aýdany qorǵanys is­te­ri jónindegi bóliminiń áskerı qyz­met­shileri ardagerdi týǵan kúnimen jáne Jeńis kúnimen quttyqtady.

18 jasynda óz erkimen maı­danǵa attanǵan óskemendik Evgenıı Fedorovıch I.V. Panfılov atyn­daǵy 8-gvardııalyq atqyshtar dıvı­zııa­synyń quramynda so­ǵys­­qan. Fashızmdi jeńýge óz úlesin qosqan arda­gerdi О́skemen garnızonynyń áskerı qyzmetshileri arnaıy baryp quttyqtady.

Al Qorǵanys mınıstrliginiń Gvardeısk garnızonynda Jeńis kúnine oraı uıymdastyrylǵan sal­tanatty jıynda aty ańyzǵa aınal­ǵan qolbasshy Baýyrjan Momysh­ulynyń kelini, jazýshy Zeınep Ahmetova qonaqta boldy. Ol áskerı qyzmetshiler aldynda sóz sóılep, beıbitshiliktiń qadiri, qazaqtyń salt-dástúri men ádet-ǵuryptary jaıynda sóz sóıledi.