Qarjy naryǵyn retteý jáne damytý agenttiginiń tóraǵasy Mádına Ábilqasymovanyń aıtýynsha, eki mıkroqarjy uıymy ekinshi deńgeıli bank atanýǵa nıetti bolyp otyr.
«Bizde ekinshi deńgeıli bank atanǵysy keletin eki iri mıkroqarjylyq uıym bar. Olar – KMF jáne Solva. Olardyń portfeli jáne kapıtal jetkiliktilik mólsheri bankke aınalýǵa múmkindik beredi. Byltyr tıisti zańnamalyq túzetýler jasaldy. Sonyń arqasynda mıkroqarjylyq uıymnyń áýeli lısenzııasyn tapsyryp, sosyn baryp bank lısenzııasyn alýǵa ótinim beretin talap joıyldy», dedi.
Ábilqasymova jańa bankterdiń ashylýyna qatysty talaptardy jeńildetý úshin bank júıesi týraly zańǵa túzetýlerdi ázirlep otyrǵandaryn da málimdedi.
«Osy túzetýler qabyldanǵannan keıin ekinshi deńgeıli bank ashýǵa degen nıettiler kóbeıedi dep úmittenemiz», dedi agenttik basshysy.
Agenttik tóraǵasy otandyq bankterge qatysty qaıtalama sanksııa týraly saýalǵa da jaýap berdi. Onyń aıtýynsha, bizdiń qarjy ınstıtýttary antıreseılik sanksııalardy buzyp otyrǵan joq.
«О́z tarapymyzdan bank júıesinde ondaı qatelikterdiń bolmaýy úshin barlyq sharany qabyldaımyz. Mindetimiz – otandyq bankterge qandaı da bir qaıtalama sanksııalardyń salynýyna jol bermeý. Sheteldik retteýshiler engizgen sanksııaǵa sáıkes bolý úshin qazir barlyq bank ózderiniń komplaens júıesin qatańdatty. Sonymen qatar zańnamalyq deńgeıde bankter úshin klıentterdiń belgili bir standarttardy saqtaýyna qatysty mindetti talap bekitildi. Bul aqsha aýdarymy, transshekaralyq tólemderdi júzege asyrýǵa baılanysty. Negizinen, klıentterdi, sońǵy benefısıar ıelerin tekserý, monıtorıng jáne klıentter operasııalaryn zerdeleý júrgiziledi. О́z tarapymyzdan barlyq qajetti normatıvtik-quqyqtyq bazany, táýekelderdi basqarý júıesine qatysty talaptardy bekittik. Ol talaptar tek bank sektoryna ǵana emes, qarjy naryǵynyń barlyq salalaryna – saqtandyrý, baǵaly qaǵazdar jáne mıkroqarjy uıymdaryna da arnalǵan», dedi M.Ábilqasymova.
Sonymen qatar ol 2022 jyly reseılikterdiń bizdiń bankterden 500 myńnan astam shot ashqanyn da habarlady. Onyń sózinshe ekinshi deńgeıli bankter shot asha otyryp, barlyq tıisti tekserýlerdi júrgizgen. Qazir bes bank – Halyk Bank, «Bank SentrKredıt», Bank VTB (Kazaqstan), Freedom Bank jáne Bereke Bank otandyq jáne reseılik azamattardyń «Mır» kartasyna qyzmet kórsetedi. Aıtýynsha, AQSh Qarjy mınıstrligi delegasııasy tarapynan «Mır» tólem júıesin paıdalanýǵa qatysty eshqandaı shekteý bolmaǵan.