Aqsha aýdarymy arta tústi

Aqsha aýdarý júıeleriniń ishinde reseılik «Zolotaıa Korona» kósh bastap tur, ol arqyly bıyl qańtar-aqpan aılarynda 28,1 mlrd teńge aýdarylǵan. Olardan keıin Western Union (10,8 mlrd teńge), MoneyGram (6,1 mlrd teńge), «Iýnıstrım» (5,5 mlrd teńge) jáne Contact (2,6 mlrd teńge) tur. Aqsha aýdarý júıesi arqyly eń kóp aqsha aýdarylǵan elderdiń ishinde Reseı birinshi orynda: bıyl qańtar-aqpan aılarynda 21,7 mlrd teńge: 2022 jyldyń qańtar-aqpanyndaǵy 3,8 mlrd teńgemen salystyrǵanda 5,7 ese ósken.

Odan keıin О́zbekstan: 6,1 mlrd teńge, bir jyldaǵy ósim – 1,3%. Alǵashqy úshtikti Ońtústik Koreıa túıindegen. Atal­ǵan elden 5,2 mlrd teńge aýdarylǵan. Bir jyl ishindegi ósim – 14,7%. Sodan keıin AQSh (5,2 mlrd teńgeden sál az), Túrkııa (3 mlrd teńge), Qyrǵyzstan (2,6 mlrd teńge) jáne Germanııa (2,5 mlrd teńge) ornalasqan.

Ranking deregi boıynsha bıyl qańtar-aqpan aılarynda AAJ arqyly elimizge aýdarylǵan aqshanyń 40,7%-y Reseıden kelipti. Byltyrǵy kórsetkish 12,2% bol­ǵan. Salystyrý úshin aıtar bolsaq, 2021 jyldyń qańtar-aqpan aılarynda RF úlesi – 20,2%, 2020 jyldyń sáıkes kezeńinde – 30,9%, al koronadaǵdarys aldyndaǵy 2019 jyldyń qańtar-aqpa­nyn­da 42,3% boldy.

Aı saıynǵy kórsetkishke qarar bolsaq, Reseıdiń AAJ arqyly Qazaqstanǵa aýdarymdarynyń úlesi 2019 jyldyń ortasynan beri 40%-dan tómen tústi. 2020 jyldyń tamyz aıynan bastap bul kórsetkish 30%-dan joǵarylaǵan joq, al 2021 jyldyń qyrkúıeginen 2022 jyldyń naýryzyna deıin 12%-dan 18%-ǵa deıin ózgerdi. Alaıda 2022 jyldyń sáýirinen bas­tap, Ýkraınada soǵys bastalǵannan keıin elimizge aýda­rym­dardyń jalpy kólemindegi RF úlesi 34,9%-ǵa deıin ósti jáne ótken jyldyń sońyna qaraı ol 47%-dan 73%-ǵa deıin ulǵaıdy. Nátıjesinde, eger jalpy 2021 jyly Reseıdiń bizdiń elge aýda­rymdardaǵy úlesi nebári 18,7%-dy qurasa, 2022 jyly 52,6%-ǵa jetti.