Búginde tupnusqasy Londondaǵy Brıtan mýzeıinde saqtaýly turǵan HH ǵasyrǵa tıesili qazaq másisiniń kóshirme nusqasy elordanyń Almaty aýdanynda ornatyldy. Kezinde Jetisý jerinen aǵylshyn zertteýshileri taýyp, óz eline alyp ketken qazaq másisine qoıylǵan erekshe art-nysan Astanadaǵy «Jetisu» turǵyn úı kesheniniń aýlasynda boı kóterdi.
Astanalyq sýretshi Mansur Smaǵambetovtiń erekshe óner týyndysy kóshpelilerdiń ulttyq stılinde jasalǵan. Art-nysannyń bıiktigi úsh metr.
«Bul mási shynymen úlken «saıahat» jasap otyr. Jetisý jerindegi aıaqkıim Tumandy Albıon jaǵalaýyna deıin jetti. Aǵylshyndardyń uqyptylyǵy arqasynda qazaqtyń másisi búgingi kúnge deıin sol qalpynda saqtalyp, Ulybrıtanııanyń bas mýzeıiniń tórinen oryn aldy. Másini Brıtanııa mýzeıinen kórgen soń, qazaqtyń ulttyq tamyryn bildiretin dúnıelerimizdi ózimizdiń jerimizde de ornatyp, dáripteýimiz kerek dep oı túıdim. Sol oımen byltyr jeltoqsan aıynda úlken isti bastap ketken edik. Mine, búgin sátin salyp, Jetisý jerindegi jádigerimizdi «Jetisu»-ǵa qaıtardyq», deıdi sýretshi.
Músin arqyly máńgilik másini beınelegen art-nysan «Qazaqtýrızm» AQ men BI Group kompanııasynyń qoldaýymen turǵyzylǵanyn da aıta ketken jón.