Dzıýdodan Katardyń astanasy – Dohada ótken álem chempıonaty óz máresine jetti. Bir aptaǵa sozylǵan básekeler barysynda barlyǵy 14 júlde jıyntyǵy sarapqa salyndy. О́kinishke qaraı, sol medalderdiń birde-bireýi Qazaqstannyń balýandaryna buıyrǵan joq. Jerlesterimizdiń arasynan eń úzdik nátıjege Ábıba Ábýjaqynova qol jetkizdi. Asa jeńil salmaqta beldesken burymdymyz besinshi oryndy qanaǵat tutty. Biraq ol jeńis tuǵyryna kóterile almaǵannan keıin bul kórsetkishke kóńilimiz toldy dep aıta almaımyz.
Jer-jahannyń myqtylary jınalǵan jarysta sońǵy ret 2014 jyly Reseıdiń Chelıabi qalasynda ótken álem chempıonatynda ońbaı súringen edik. Sol kezde dzıýdoshylarymyz tegis utyldy. Odan keıingi alty jarysta asyǵymyz alshysynan tústi. Atap aıtsaq, 2015 jyly Astanada Eldos Smetov (altyn) pen Rýstam Ybyraev (kúmis), 2017 jyly Býdapeshte Otgonseseg Galbadrah (qola), 2018 jyly Bakýde Erlan Serikjanov (kúmis) pen Galbadrah (qola), 2019 jyly Tokıoda Smetov (qola), 2021 jyly Býdapeshte Ǵusman Qyrǵyzbaev (kúmis) jáne 2022 jyly Tashkentte Smetov (qola) pen Ábıba Ábýjaqynova (qola) jeńis tuǵyryna kóterilip, jankúıerlerdi qýanysh pen shattyqqa bóledi.
Parsy shyǵanaǵynda ótken álem chempıonatynda elimizdiń eń úzdik 18 balýany tatamıge shyqty. Solardyń arasynan 48 kılo salmaqta óner kórsetken Ábıba Ábýjaqynovanyń ǵana táýir kúresti. Nebir myqty qarsylasty jolynan yǵystyrǵan qazaq qyzy jartylaı fınalda jeńilistiń kermek dámin tatty. Bul mejede onyń Eýropanyń eki dúrkin chempıony, álemdik reıtıngte kósh bastap turǵan fransııalyq Shırın Býklıge áli jetpedi. Al qola medal úshin saıysta Ábıba ıtalııalyq Assýnta Skýttoǵa ese jiberdi. Byltyr Tashkenttegi álemdik dodada dál osy eki sportshy jeńis tuǵyrynyń úshinshi satysynda qatar turǵan edi.
Atalǵan jarysta Nurqanat Serikbaev pen Nurlyhan Sharhannyń da «shabysy» jaman bolǵan joq. 60 kılo salmaqta kúsh synasqan Nurqanat bastapqy básekelerdiń birinde Olımpııa oıyndarynyń kúmis, álem chempıonaty men Azııa oıyndarynyń qola júldegeri, álemdik reıtıngte birinshi orynda turǵan taıpeılik Iаn Iýnveıden aılasyn asyrǵanda keýdemizde úmit oty jylt ete qaldy. Biraq kelesi aınalymda onyń jolyn Japonııanyń juldyzy, Tokıo Olımpıadasynyń jeńimpazy, Rıo Olımpıadasynyń kúmis júldegeri, álemniń tórt dúrkin chempıony Naohısa Takato bógedi. Al jubanysh básekesinde Serikbaevty grýzııalyq Georgıı Sardalashvılı san soqtyryp ketti.
100 kılo salmaqtaǵy Nurlyhan Sharhan jarysty óte tamasha bastady. Qandasymyz úshinshi aınalymda grýzııalyq Varlam Lıpartelıanıdi jolynan yǵystyrdy. Al ol kim deseńiz, aıtar jaýabymyz daıyn. Lıpartelıanı – Rıo Olımpıadasynyń fınalısi, álem chempıonatynyń alty dúrkin júldegeri, komandalyq álem chempıonatynyń eki dúrkin jeńimpazy, Eýropanyń segiz dúrkin chempıony (3 ret jeke, 5 ret komandalyq esepte) jáne Eýropa oıyndarynyń eki dúrkin kúmis júldegeri. Ataǵynan at úrketin apaıtós qazaqtyń qaısar ulynyń aldynda sharasyzdyq tanytty. Odan keıin Nurlyhannyń joly dańqy jer jarǵan Chehııanyń balýany Lýkash Krpalekpen qıysty. Olımpıada men álemniń eki jáne Eýropanyń úsh dúrkin chempıony jerlesimizdi ońaı jyqty. Ábden kúshi sarqylǵan Sharhan jubanysh beldesýinde Izraıldiń maqtanyshy, Olımpııa oıyndarynyń qola júldegeri (komandalyq esepte), Eýropa chempıony Peter Palchıktiń osal tusyn taba almady.
Dohadaǵy álem chempıonatynda biz Eldos Smetov (60 kılo), Ǵusman Qyrǵyzbaev (66 kılo), Jansaı Smaǵulov (73 kılo), Danııar Shamshaev (73 kılo) jáne Dıdar Hamza (90 kılo) syndy talaı dúrmekterde ysylyp, kóptegen dúbirli dodalarda daralanǵan sańlaqtarǵa aıryqsha úmit artqan edik. О́kinishke qaraı, olar senim údesinen shyǵa almady. Sol sekildi Abylaıhan Jubanazar (81 kılo), Ǵalymjan Qyryqbaı (+100 kılo), Ǵalııa Tynbaeva (48 kılo), Tolǵanaı Ábeýova (52 kılo), Baqyt Qusaqbaeva (57 kılo), Esmıgúl Kýıýlova (63 kılo), Anastasııa Maıakova (70 kılo), Arýna Jangeldına (78 kılo), Kamıla Berliqash (+78 kılo) jáne Aqerke Ramazanova da (+78 kılo) bastapqy kezeńderde súrindi.
Erler arasyndaǵy jarystyń jalpy komandalyq esebinde Grýzııa quramasy jeke-dara kósh bastady. Qap taýynyń qyrandary 2 altyn, 1 kúmis jáne 1 qolany oljalady. Sondaı-aq TOP-10-dyqqa myna komandalar endi: Japonııa (1+1+3), Reseı (1+1+0), Fransııa men Shveısarııa (1+0+1), Ispanııa (1+0+0), О́zbekstan (0+1+2), Italııa, Belgııa jáne Chehııa (0+1+0).
Áıelder arasyndaǵy saıys japondardyń (4+1+2) aıqyn jeńisimen aıaqtaldy. Odan keıingi satylarǵa Fransııa (1+3+1), Kanada men Izraıl (1+0+1), О́zbekstan, Slovenııa, Germanııa (0+1+0), Italııa (0+0+3) jáne Nıderland (0+0+2) quramalary jaıǵasty.
Álem chempıonatynyń jeńimpazdary men júldegerleri
(Erler)
81 kılo: 1. Tato Grıgalashvılı (Grýzııa), 2. Mattıas Kasse (Belgııa), 3. Takanorı Nagase (Japonııa) men Lı Jonhvan (Ońtústik Koreıa).
90 kılo: 1. Lýka Maısýradze (Grýzııa), 2. Lasha Bekaýrı (Grýzııa), 3. Markýs Nıýman (Shvesııa) men Sanshıro Maýrao (Japonııa).
100 kılo: 1. Arman Adamıan (Reseı), 2. Lýkash Krpalek (Chehııa), 3. Zelım Kosoev (Ázerbaıjan) pen Peter Palchık (Izraıl).
+100 kılo: 1. Teddı Rıner (Fransııa), 2. Inal Tasoev (Reseı), 3. Álisher Iýsýpov (О́zbekstan) pen Rafael Sılva (Brazılııa).
(Áıelder)
63 kılo: 1. Klarıss Agbenený (Fransııa), 2. Andreıa Leshkı (Slovenııa), 3. Sofı Ozbas (Majarstan) pen Djoann van Lıshaýt (Nıderland).
70 kılo: 1. Sakı Nızoe (Japonııa), 2. Djovanna Skochchımarro (Germanııa), 3. Mıhaela Polleres (Avstrııa) pen Barbara Matıch (Horvatııa).
78 kılo: 1. Inbar Lanır (Izraıl), 2. Odrı Chıomeo (Fransııa), 3. Gıýshe Stenhıoıs (Nıderland) pen Elıs Bellandı (Italııa).
+78 kılo: 1. Akıra Sone (Japonııa), 2. Djýlııa Tolofýa (Fransııa), 3. Beatrız Soýza (Brazılııa) men Raz Gershko (Izraıl).