Densaýlyq saqtaý salasyna sıfrlyq júıe dendep ense, qyzmet kórsetý sapasy edáýir jaqsaratyny anyq. Emhanalarda uzyn-sonar kezek azaısa, muny sıfrlandyrýdyń sharapaty dep bilemiz. Sebebi sıfrlyq júıege kóshý – zaman talaby.
Qazirdiń ózinde dárigerdiń qabyldaýyna jazylýǵa, dárigerdi úıge shaqyrýǵa, taldaý nátıjelerin jáne basqa da derbes medısınalyq derekterdi bilýge múmkindik beretin sıfrlyq qural múmkindikterin paıdalanatyn pasıentter bar. Osy qyzmetter qazir elektrondyq úkimet portalynda qoljetimdi. Medısınalyq kómektiń qoljetimdiligin arttyryp, jumysty biraz shırata túsetin sıfrlyq júıe jóninde Densaýlyq saqtaý vıse-mınıstri Beıbit Esenbaev baspasóz máslıhatynda aıtyp berdi.
– Turǵyndar elektrondyq medısınalyq qujattarǵa qol jetkizse, medısınalyq uıymdarǵa qujat úshin baratyn pasıentter azaıady. Osy rette densaýlyq saqtaý mınıstrligi sıfrlyq damý, ınnovasııalar jáne aeroǵarysh ónerkásibi mınıstrligimen birlesip, byltyr eGov mobile mobıldi qosymshasynda «eDensaulyq» servısin iske qosty. Onda pasıentter úshin donorlyq mártebe, elektrondyq reseptiler, medısınalyq qarsy kórsetilimder, júkti áıelderdi esepke alý jáne dıspanserleý, emdeýge jatqyzý men zerthanalyq taldaý nátıjelerin bilýge arnalǵan aqparat kóp qamtylǵan. Mysaly, jalpy aqparat bóliminde turǵyndar qaı medısınalyq uıymǵa tirkelgenin, qaı ýchaskege qaraıtynyn, ýchaskelik dárigerdiń derekterin, mindetti áleýmettik medısınalyq saqtandyrý sheńberinde mártebesin jáne qorǵa aýdarylǵan sońǵy tólemniń somasy men kúnin de kórýge bolady, – deıdi B.Esenbaev.
Osylaısha, «eDensaulyq» servısiniń qyzmeti kezeń-kezeńimen keńeıedi. Jaqynda servıske azamattardyń qan toby jáne basqa da aqparattar qosylady. Sonymen qatar mınıstrlik eGov mobile mobıldi qosymshasynyń dárilik zattardy úlestirý bóliginde Áleýmettik ámııan jobasyn iske asyryp jatyr. Munda pasıent emhanadaǵy dárihanaǵa baryp, QR-kodyn usyný arqyly resept boıynsha dári-dármek alsa bolady. Qanatqaqty joba qazir Astana qalasynyń emhanalarynda júzege asýda. Densaýlyq saqtaý mınıstrligi pasıentterdi osy servıstiń múmkindigin molynan paıdalanýǵa shaqyryp jatyr. Jobany bıyl elimizdiń basqa óńirlerine engizý josparda bar eken.
Memleket basshysy Qasym-Jomart Toqaev osyǵan deıin densaýlyq saqtaý salasynda aqparattandyrý deńgeıi tómen ekenin aıtqan-dy. Bul medısına qyzmetkerlerine mindettelgen júktemeniń artýyna ákep tireýi múmkin. Qazirdiń ózinde dárigerler bir ýaqytta birneshe júıede jumys isteýge májbúr. Ári pasıentter óziniń jeke medısınalyq derekterine tolyq qol jetkize almaıdy. «eDensaulyq» servısinde pasıentke qatysty barlyq negizgi derek shoǵyrlandyrylady. Bul densaýlyq saqtaý salasyndaǵy aqparattyq júıelerdi bir arnaǵa toǵystyrýǵa yqpaldasady. Búginde densaýlyq saqtaý júıesinde dárigerge qaralatyn ýaqytty naqtylaýǵa septesetin kóptegen beıresmı kezek bar. Alaıda pasıent óz kezeginiń qashan keletinin árdaıym dálme-dál bile bermeıdi. Qazir osy beıresmı kezekter sıfrlandyrylyp jatyr. Osy rette eGov mobile qosymshasyndaǵy «eDensaulyq» servısi pasıentterge usynylatyn qyzmetterdiń tizimin kórýge jáne «kórsetilmegen qyzmetti qosyp jazý» syndy faktiler anyqtalǵan jaǵdaıda áleýmettik medısınalyq saqtandyrý qoryna júginýge múmkindik beredi. Sondaı-aq medısınalyq kómek kórsetýdiń ashyqtyǵyn saqtaýǵa septesedi.