Bıyl óńirde 157 jas kásipker tómen paıyzben nesıe alyp, ózderiniń bıznes ıdeıalaryn iske asyrýdyń múmkindigin ıelenip otyr. Paıyzy tómen nesıe otyz bes jasqa deıingi kásipkerlerge jeti jyl merzimge berilmek.
«Agrarlyq nesıe korporasııasy» bıznes salasynda óz ıdeıalaryn júzege asyra bastaǵan jastardy qoldaý maqsatynda jyldyq mólsherlemesi 2,5 paıyzdan aspaıtyn nesıe berýdi bastap ketti. Bes mln teńgege deıin beriletin arzan nesıege Kerekýde úmitti azamattar kóp. Qaryz alýshy kepilge jyljymaıtyn múlik, aýylsharýashylyǵy úshin mańyzǵa ıe jer telimderin, arnaıy tehnıkalardy qoıa alady.
Ereksheligi, qarajat bes jylǵa deıingi merzimge kez kelgen maqsatqa berile beredi. Al mal sharýashylyǵyn damytqysy keletinder úshin nesıeni tóleý merzimi jeti jylǵa deıin uzartylǵan. Buǵan qosa negizgi qaryz ben syıaqyny qaıtarý boıynsha jeńildik merzimi qarastyrylǵan. Oǵan shaǵyn nesıeni tóleý merziminiń úshten bir bóliginen kóp emes ýaqyt belgilenedi.
О́ńirlik jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, jýyqta jastardy jeńildikti shaǵyn nesıelendirý boıynsha oblystyq komıssııanyń otyrysy ótip, onda bıznes jobalar iriktelgen. Búginge deıin 20 úmitkerden ótinim túsipti. Jas kásipkerler jolaýshylar tasymalyn uıymdastyrý, kıim dúkeni, jylqy, sıyr jáne usaq mal ósirý boıynsha óz jobalaryn usynǵan.
Kásipkerlikti damytýdyń ulttyq jobasy boıynsha 2,5 paıyzdyq shaǵyn nesıeler bıznesin jańadan bastaǵysy kelip otyrǵandarǵa nemese bıznesin júrgizip jatqan jastarǵa beriledi. Konkýrstyq júıe olardyń ishindegi áleýettilerin tańdap alady. 2023 jylǵa óńirge 785 mln teńge bólingen. Mamandar bul soma 157 jas kásipkerdi qamtýǵa jetkilikti dep otyr.
Negizi Kásipkerlikti damytýdyń ulttyq jobasy bul nesıeden bólek kásipkerlikterdiń ózge de sanattaryn qarjylandyrýǵa, nesıe paıyzdaryn azaıtýǵa jaǵdaı týdyrýda. Mysaly, júk tasymalymen aınalysatyn pavlodarlyq Narıman Mýsın alǵashqy kommersııalyq kólikti nesıege satyp aldy. Ol kólikpen jol qurylysyna qajet bıtým tasymaldaıtyn jospary bar. Iskerlik baılanystardyń keńeıýine baılanysty kásipker «Kásipkerlikti damytýdyń 2021-2025 jyldarǵa arnalǵan ulttyq jobasy» baǵdarlamasy boıynsha traktor satyp alýǵa ótinish bildirgen. Sóıtip, ekinshi deńgeıli bankten jyldyq mólsherlemesi 21,75 paıyzben nesıe rásimdeıdi. Saıyp kelgende kásip ıesi bul mólsherlemeniń nebári 6 paıyzyn ǵana tóleıdi. Qalǵan aıyrmany memleket sýbsıdııalap beredi. Nesıeni rásimdeý kezinde Narıman Saılaýulynyń kepilge qoıǵan múlki jetkiliksiz bolyp shyqqan. «Damý» qory oǵan kómekke kelip, jetpegen kepildiń ornyn toltyrdy.
«Búginde bizdiń bıznesimizdiń turaqty tutynýshylary bar. Jumysymyzda arnaıy tehnıkalar óte qajet. Bizdiń bızneste bir orynda turyp qalýǵa bolmaıdy, únemi shekarany keńeıtip otyrǵan mańyzdy. Eń bastysy, kólikterdiń jaǵdaıyn turaqty qadaǵalap, klıenttik bazany toltyrýymyz kerek. Keleshekte jaǵdaıymyz jetip jatsa taǵy da arnaıy kólik quraldaryn satyp alatyn josparymyz bar», deıdi ol.
Pavlodar oblysy