Etekte jaz bolǵanymen, taýly jerdegi qardyń kóbesi endi ǵana sógildi. Sondyqtan da TJD qyzmetkerleri 15 mamyrdan bastap Shyǵys Qazaqstanda sel júrý qaýpi baryn eskertip otyr.
Anyqtalǵandaı, Katonqaraǵaı, Altaı jáne Zaısan aýdandarynda, Rıdder qalasynda barlyǵy 13 sel júrýdiń qaýipti oshaǵy bar eken. Qaýip tónip turǵan tóńirektegi taýlarda uzyn-sany 144 morenalyq kól qalyptasqan. Arnaıy mamandar jyl saıyn qaýipsizdik maqsatynda kól betindegi muz erı bastaǵan sátten jaz ortasyna deıin qadaǵalap, tekserýmen bolady.
Sonymen qatar taý betkeılerindegi syrǵyma qaýipti 9 ýchaske bary anyqtaldy. Ásirese, kúre joldardyń boıyndaǵy betterden syrǵıtyn shaǵyl tas ári-beri aǵylǵan jolaýshylarǵa qaýip tóndiredi. Munyń aldyn alý úshin tótenshe jaǵdaılar departamenti «Qazseldenqorǵaý» MM Shyǵys Qazaqstan aýmaqtyq paıdalaný basqarmasy fılıalymen birlesip, sel jáne syrǵyma qaýpi bar ýchaskelerde turǵyndar men ınfraqurylymnyń qaýipsizdigin qamtamasyz etý úshin is-sharalar jospary daıyndaldy. О́zen arnalary jáne sel, syrǵyma qaýipti ýchaskelerde jerústi jáne aerovızýaldy zertteý kestesi ázirlendi. Morenalyq kólderde batımetrııalyq jumystar atqaryldy. Sel qaýpi bar ýchaskelerde 20 eskertý jáne tyıym salý taqtaıshalary ornatyldy.
Kóshkin sel jáne syrǵyma qaýpi bar aýdandardyń jergilikti atqarýshy organdaryna, ǵımarattary qaýpi bar ýchaskelerde ornalasqan kásiporyn basshylaryna, jeke úı ıelerine eskertý paraqshalary taratyldy.
Aıta keterligi, sel jaǵdaıyna baqylaý júrgizý úshin maýsymdyq 9 gıdropost jáne jyl boıyna jeke bir gıdropost jumys isteıtin bolady. Mamandardyń pikirinshe, sel júrý maýsymynda taý-tasqa shyǵýdy keıinge shegere turǵan abzal.
Shyǵys Qazaqstan oblysy