Bul joly da О́ner mýzeıinde ótip jatqan «Mýzeı túni» halyqaralyq aksııasyna jınalǵan jurttyń qarasy az bolmady. Kúmbirlete kúı tókken dáýlesker kúıshi de, jeztańdaı ánshi de mýzeılerdiń mańynan tabyldy. Qylqalam sheberleriniń de bastary qosylyp, máre-sáre bolysty.
О́ner mýzeıiniń «Mýzeıdegi eksponat» atty bólimin tamashalaýǵa kelgen kórermendi dombyrashylar kúımen qarsy aldy. Baldyrǵandar da bı bılep, án saldy. Jaýhar dúnıeler qoıylǵan sórelerdi qyzyqtaǵan el Nadejda Habarovanyń qysh ydystaryn óńdeýdegi sheberligin kórip, tańdaı qaǵysty. Tórgi zalda kompıýterlik grafıka áýesqoılary «Digital art» baıqaýynda jańa tehnologııanyń ǵajap múmkindikterine tánti boldy. Úlken zalda mýzeı jobalarynyń eń belsendi qatysýshylary marapattaldy. Olardyń ishinde sýretshiler, mýzykanttar, shyǵarmashylyq ujymdardyń jetekshileri bar.
– Bizdiń babadan qalǵan muramyzdy saqtap kele jatqan mýzeıdiń orny erekshe. Baıyrǵy ónerdiń órnegin saqtap otyrǵan mýzeıdiń jumysy jemisti bolsyn. Búgingi bolyp jatqan «Mýzeı túni» sharasy kórermenderge rýhanı lázzat syılasyn, – dedi Mádenıet, sport, týrızm jáne aqparat qyzmetkerleriniń qazaqstandyq salalyq kásiptik odaǵy oblystyq fılıalynyń tóraǵasy Túsiphan Túsipbekov.
Mádenı shara barysynda sýretshiler kórermenderdiń portretterin salyp, qonaqtarǵa tartý jasady. Mýzeı qonaqtary model retinde «Sen – basqasyń», «Sen – osyndaısyń» jáne «Úzdik qoltańba» baıqaýlaryna qatysyp, túrli syılyqtarǵa ıe boldy.
– Mýzeı – bizdiń qara shańyraǵymyz. Qaı ýaqytta bolsyn óner týyndymyzdy arqalap osy mádenıet oshaǵyna kelemiz. Bul rýhanı shańyraq sýretshilerdiń kórmelerin ótkizip, qylqalam sheberlerine qoldaý kórsetip otyrady, – dedi sýretshi Qudash Nursadyqov.
Bul kúni óńirdegi ózge de mýzeılerde qyzyqqa toly tanymdyq is-sharalar ótip jatty.
О́skemen