Qyzylordadaǵy oblystyq kásipkerler palatasyna jalpy kólemi 82,8 mln teńge aıyppul arqalaǵan 7 kásipker arasha suraı kelipti. Jalpy mundaılardyń qatary 80-nen asyp jyǵylatyn kórinedi. Biraq kópshiligine salynǵan aıyppul kólemi ázirge belgisiz bolyp otyr.
Tıisti oryndar saýda salasynda qyzmet kórsetetinderdiń deni qosylǵan qun salyǵyn tóleýshi retinde ýaqtyly tirkelmegendikten osyndaı jaǵdaıǵa ushyrap otyrǵanyn aıtady.
«Men altyn buıymdaryn qaryzǵa alyp satamyn. Byltyr jeltoqsan aıynda salynǵan 4,3 mln teńge aıyppuldy nesıe alyp, jedel japtym. Endi bıyl sáýirde 920 myń, artynsha 27 mln teńgege habarlama kelip tur. Osy mıllıondaǵan qarjyny 3 aı ishinde tóleýim kerek eken. Ony qalaı jabamyn? Mundaı kólemde maǵan nesıe de bermeıdi ǵoı», deıdi memlekettik kirister organynan eskertpe alǵandardyń biri Rázııa Shaımaǵambetova.
Kásipkerler palatasynyń alańynda memlekettik kirister organy mamandarynyń qatysýymen ótken «Ashyq esik» kúninde qarmaqshylyq kásipker Baǵıla Nesipbaeva da osyndaı aryz aıtty. Saýdamen aınalysatyn erli-zaıyptylar osyǵan deıin salyq pen ózge de tólemderdi keshiktirmeı tólep kelgen. Osydan 2 jyl buryn aınalym qarajaty mejege jetip qalǵanyn eskertken salyq mamanynyń keńesimen úsh quramdasty ıntegrasııalanǵan júıege ótken. Osy júıe boıynsha barlyq mindettemeni óteýden qashqan kezi joq. Bıyl jyl basynda shaqyrǵan salyqshylar qosymsha qun salyǵyn tóleýshi retinde tirkelýdi eskertip, sońǵy eki jylǵa 25,7 mln teńge aıyppul salypty
«Biz maman emespiz. Býhgalter ustap otyrýǵa jaǵdaıymyz kelmeıtindikten de salyq mamandarymen keńesemiz. Endi sonyń zardabyn tartyp otyrmyz. Ol aqshany qaıdan alamyz? Osy oqıǵadan keıin jubaıym aýrýhanada jatyr», dedi Baǵıla Nesipbaeva.
Qyzylorda qalasy boıynsha memlekettik kirister basqarmasynyń bólim basshysy Saltanat Erjanovanyń dereginshe, qosylǵan qun salyǵyn tóleýshi retinde ýaqtyly tirkelmegen 84 kásipkerge aıyppul salynǵan. Palatadaǵy О́ńirlik keńes múshesi Beıbitáli Tileýlıevtiń aıtýynsha, aıyppul salynǵandardyń basym bóligi saýda salasyndaǵy kishi bıznes ókilderi.
«Halyq arasynda salyq mádenıetin qalyptastyrý úshin eskertpe-habarlama berý tásilin de ońaılatqan jón bolar edi. Býhgalteri joq shaǵyn kásipkerler toqsandyq, jyldyq esepterin bir rettik qyzmet kórsetetin mamandarǵa tapsyrtady. Olardyń kópshiligi jeke kabınetin únemi ashyp otyrmaıtyny anyq. Sondyqtan da salynǵan aıyppul týraly habarlamalardy SMS arqyly jibergen durys», deıdi ol.
Qazir oblysta 67 myńnan astam kásipkerlik sýbekti turaqty jumys istep tur. Osylardyń 21 814-i saýda salasynda tirkelgen. Olarda óńirde jumyspen qamtylǵandardyń 17,5 paıyzy jumys isteıdi. Palataǵa aryzyn aıtyp kelgen 7 kásipker 23 adamǵa jumys taýyp berip otyr.
«Bıznes ókilderin alańdatqan bul másele jyl basynda oblys ákiminiń birinshi orynbasary Serik Qojanııazovtyń tóraǵalyǵymen ótken jumys tobynda da qaralǵan edi. Sonda dál osy problema respýblıka kóleminde 2 myń kásipkerdiń basynda bar ekeni belgili bolǵan. Al aıyppul salynǵandar sanynyń azaımaýy bul problemanyń áleýmettik jaǵyn eskerý kerektigin ańǵartyp tur. Bul másele Úkimettik deńgeıde sheshilýi kerek», deıdi Kásipkerler palatasynyń dırektory Pirmuhammed Syzdyqov.
Qyzylorda oblysy