Astanadaǵy Ulttyq akademııalyq kitaphanada aýdarmashy Rymbala Smaıylovamen kezdesý ótti. Is-shara barysynda jazýshy-dramatýrg Nuraına Sátbaevanyń «Álkanyń kúmis tumary» kitabynyń qazaqsha nusqasy tanystyryldy.
Aýdarmashynyń aıtýynsha, kitap tek balalarǵa ǵana emes, eresekter úshin de qyzyqty. Sebebi týyndy tartymdy tilmen tanymdyq sıpatta jazylǵan. Oqyrman týyndydan «Qyzyl kitapqa» engen janýarlar álemi, qustar men sırek kezdesetin ósimdikter týraly qyzyqty aqparattar alady. Kitapta Kaspıı jaǵalaýyndaǵy flora men faýna týraly qyzyqty málimetter de bar. Shyǵarma ulttyq tanymǵa negizdelip, onda ata men nemereniń qarym-qatynasy, qazaqtyń tórt túlikke qatysty ustanymdary sııaqty qazaqqa qasterli uǵymdar qamtylǵan.
Atalǵan eńbekte Aqtaýda turatyn Álka esimdi balanyń bastan keshken oqıǵalary baıandalady. Oǵan atasy otbasynyń qasıetti murasy – kúmis tumardy syılaıdy. Sodan balanyń boıyna sıqyrly qasıet bitip, janýarlar men qustardyń tilin uǵa bastaıdy. Osy arqyly qıyn jaǵdaıǵa tap bolǵandarǵa kómektesedi. Tabıǵatty qorǵap, aıalaýǵa shaqyratyn kitapty ekologııalyq týyndy desek te bolady.
Rymbala Smaıylova Qaraǵandy qalasynda turady. Mamandyǵy polıgrafıst bolǵanymen, jubaıy, jazýshy-pýblısıst, aýdarmashy Maral Hasenniń yqpalymen ádebı aýdarmaǵa kelgen. Atap óterligi ol jazýshy aıaqtaı almaı ketken aýdarmalardy tárjimalap támamdaǵan. Mundaı shyǵarmalardyń qatarynda Svetlana Aleksıevıchtiń «Myryshqa aınalǵan qyrshyndar», Elıs Monronyń «Shat-shadyman kóleńkelerdiń bıi» atty kitaptary bar. Sonymen qatar R.Smaıylova Garrı Greıdiń «Bir kezderi Amerıkada» atty týyndysyn qazaqshalaǵan.
Mereı AÝǴALI,
L.N.Gýmılev atyndaǵy EUÝ-diń stýdenti