Shaıbaly hokkeıden Fınlıandııanyń Tampere jáne Latvııanyń Rıga qalalarynda ótip jatqan álem chempıonatynyń pleı-off kezeńine shyqqan quramalar belgili boldy. Elıtaly kezeńniń toptyq kezeńinde baq synaǵan 16 komandanyń ishinde eń úzdik nátıje kórsetken segiz qurama álemdik dodanyń shırek fınalyna joldama alady.
Atap aıtqanda, toptyq kezeńde merziminen buryn pleı-off joldamasyn qorjynyna salǵan eki dúrkin álem chempıony, 1/4 kezeńderiniń turaqty qatysýshysy – AQSh, jahan birinshiliginiń 11 márte jeńimpazy, 19 ret fınalda óner kórsetken – Shvesııa jáne byltyrǵy álem chempıonatynyń jeńimpazy Fınlıandııa hokkeıshileriniń qataryn sońǵy týrda Phenchhan Olımpıadasynyń kúmis júldegeri Germanııa quramasy tolyqtyryp, qatarynan tórtinshi jyl shırek fınalda oınaý múmkindigine ıe boldy. Nemis hokkeıshileri sońǵy týrda elıtaly topqa byltyr arnaıy shaqyrtýmen qosylyp, bıyl ekinshi márte álem chempıonatynda óner kórsetken Fransııa quramasyn 5:0 esebimen jeńdi.
Al V tobynda álem chempıonatynyń úsh dúrkin fınalısi – Shveısarııa, 1998 jylǵy Olımpıada chempıony – Chehııa jáne álem birinshilikteriniń tarıhynda eń kóp jeńiske jetken (27!) Kanada quramalarynyń qataryna sońǵy týrda jarys qojaıyny – Latvııa hokkeıshileri qosyldy. Latvııalyqtar sońǵy týrda týrnır kestesiniń kóshbasshysy Shveısarııa quramasyn overtaımda opyq jegizip, topta úshinshi orynmen pleı-off kezeńine shyqty. Latvııa óz tarıhynda osymen tórtinshi márte shırek fınalǵa shyǵyp otyr.
Jerebe qorytyndysy boıynsha, shırek fınalda A tobynyń kóshbasshysy AQSh V tobynda tórtinshi orynǵa turaqtaǵan Chehııa quramasymen, V tobynyń birinshi oryn ıegeri Shveısarııa A tobynda tórtinshi satyǵa jaıǵasqan Germanııamen sheberlik baıqasady. Sonymen qatar Shvesııa (2A) – Latvııa (3V) jáne byltyrǵy chempıonattyń fınalısteri Kanada (2V) men Fınlıandııa (3A) quramalary jartylaı fınaldyń joldamalaryn sarapqa salatyn boldy. Jarys erejesine sáıkes, álem chempıonatynyń pleı-off básekeleri búginge, ıaǵnı 25 mamyrǵa, jartylaı fınal oıyndary 27 mamyrǵa josparlanǵan. Al fınal men úshinshi oryn úshin ótetin kezdesýler 28 mamyrǵa belgilengen.
Keıingi 10 jyldaǵy álem chempıonattarynyń tarıhyna úńiler bolsaq, jyl saıynǵy shırek fınal básekeleri dál osy quramalardyń qatysýymen ótip jatqanyn baıqaımyz. Byltyr pleı-offta oınaǵan Slovakııanyń ornyn bıyl Latvııa basty. Al ózge quramalar ótken jyly da ¼ fınalda baq synaǵan.