Saıası qýǵyn-súrgin jáne asharshylyq qurbandaryn eske alý kúnine oraı Tuńǵysh Prezıdent kitaphanasy men Prezıdent Arhıviniń 18 qujat pen 60-tan astam kitaby «ALJIR» murajaı-memorıaldyq keshenine tapsyryldy.
«1997 jyldan bastap Qazaqstanda jyl saıyn 31 mamyrda tarıhymyzdyń eń qasiretti betteriniń biri – mıllıondaǵan adamnyń ólimine ákep soqqan jappaı saıası qýǵyn-súrgin men alapat ashtyq qurbandaryn eske alý kúni atalyp ótiledi. «ALJIR»-ge berilgen bul muraǵattyq fotomaterıaldar men qujattar tarıhı ádilettilikti qalpyna keltirýge óz úles qosatynyna senim mol», dedi Tuńǵysh Prezıdent kitaphanasynyń dırektory Baqytjan Temirbolat.
«ALJIR» murajaı-memorıaldyq kesheniniń dırektory Samat Tergembaevtyń sózinshe, atalǵan keshen jappaı terror qurbandaryna arnalǵan biregeı eskertkish retinde HH ǵasyrdyń 1930-1950 jyldaryndaǵy qaıǵyly oqıǵalardyń esteligin saqtaýǵa, sondaı-aq bolashaqta mundaı aýyr qaıǵy-qasiret qaıtalanbas úshin jas urpaqtyń boıynda otansúıgishtik pen adamgershilik qasıetterdi qalyptastyrýǵa kómektesedi.
О́z kezeginde Prezıdent Arhıvi dırektorynyń orynbasary Beısembaı Jumabekov muraǵatta HH ǵasyrdaǵy saıası qýǵyn-súrgin materıaldaryn zertteý ortalyǵynyń ashylýymen respýblıkada osyndaı qujattardyń mamandandyrylǵan qoımasy paıda bolǵanyn atap ótti. Elimizde saıası qýǵyn-súrgin qurbandaryn tolyq aqtaý jónindegi memlekettik komıssııanyń jumysy tıisti resmı muraǵattyq qoldaýǵa ıe boldy.
Is-sharaǵa sondaı-aq Parlament depýtattary, Qazaqstan halqy Assambleıasynyń músheleri, Saıası qýǵyn-súrgin qurbandaryn tolyq aqtaý jónindegi memlekettik komıssııa músheleri, Selınograd aýdany ákimdiginiń qyzmetkerleri, ardagerler men qoǵamdyq uıymdardyń ókilderi qatysty.