Bir kezderi analarymyzdyń qolynan túspegen urshyq búginde estelikke, jádigerge aınalyp barady. Buryn qolyna urshyq ustamaǵan jandy kezdestirý sırek bolsa, qazir urshyqty shyrq úıiretinderdi aýyl-aýyldan izdep taýyp, ózara saıystyrý da qasıetti murany joǵaltpaýdyń, nasıhattaýdyń bir dáleli.
Mamyr aıynyń mamyrajaı kúnderiniń birinde Aqtaý qalasynda Mańǵystaý oblystyq ǵylymı-ádistemelik jáne mádenı qyzmet kórsetý ortalyǵynyń qoldaýymen «Sóz ben saz» baǵdarlamasynyń «Umytpaıyq, ulyqtaıyq urshyqty» atty rýhanı is-shara ótti. О́ńirdegi eki qala men bes aýdannan qatysqan 46 úmitkerdiń ishinen irikteý týrynan 15 úmitker ótti. Qatysýshylar arasynda 73 jastan asqan ájeler men 39 jastaǵy analar bar. О́lkege tanymal kónekóz apalar qazylyq etken saıysta shırek fınalǵa on adam ótip, óz kezeginde jartylaı fınalǵa jeti adam jiberildi, al aqtyq synda 5 úmitker baq synasty. Nátıjesinde, Munaıly aýdanynan kelgen eń jas qatysýshy V.Palýanova bas júldeger bolyp, Mańǵystaý oblystyq ǵylymı-ádistemelik jáne mádenı qyzmet kórsetý ortalyǵy taǵaıyndaǵan 150 000 teńgege ıe boldy. О́zge de júldegerlerge baǵaly syılyqtar tabystaldy. Saıys barysyndaǵy konsertke óńirge tanymal ónerpazdar men «Jibek» jetigen mektebi, «Naratý» dombyrashylar ansambli jáne «Arna» toby qatysty. Aýlada ulttyq qolóner sheberleri men ulttyq taǵamdardyń kórmesi uıymdastyrylyp, jeńiske jete almasa da qatysqan barlyq úmitker ulttyq naqyshtaǵy syılyqtarmen, alǵys hattarmen marapattaldy.
Aq jaýlyqty ájeler ulttyq qundylyqtardy nasıhattaıtyn rýhanı sharalardyń jıi uıymdastyrylýyna tilekshi ekendikterin, tek saıysyp qana qoımaı, osyndaı baıqaýlar arqyly jastarǵa óz bilgenderin úıretýge bolatyndyǵyn jetkizdi.
Mańǵystaý oblysy