«Ana júregi» aksııasy

«Ana júregi» aksııasynda aýrýhana mamandary balalarǵa konserttik baǵdarlama uıymdastyryp, kóńilin aýlasa, ózge dárigerler analardy me­dısınalyq tekserýden ótkizdi. Ári aksııaǵa osy emhanaǵa qaraıtyn pa­sıentter ǵana emes, Astana qa­la­sy boıynsha erekshe balany ala­­qa­nyna salyp otyrǵan analar jıyl­ǵan. Bul kúni kelinshekter ambý­latorııalyq tekserýden ótse, keıbiri laborotorııalyq zertteýlerge bardy. Aksııaǵa 2013 jyly nebári 17 ana qatyssa, osy joly bir kúnde 50 ana kelipti. Aýrýhana basshylyǵy aksııa bastalǵaly qoldan kelgenshe járdemdesýge nıet bildirgen qaıyrymdy jandardyń kóp bolǵanyn aıtty. Demeýshiler árkez balalarǵa syı-sııapatyn ákelip turady eken.

– «Ana júregi» aksııasy osymen onynshy jyl qatarynan bizde uıymdastyryldy. Búgin de ádettegishe analar tekserýden ótip jatqanda balǵyndar psıholog, áleýmettik qyzmetkerlerdiń baqylaýynda boldy. Biz medısınalyq mekeme bolǵan soń, bizdiń eń basty jumysymyz – árıne, turǵyndardyń densaýlyǵyn baqylaý. О́kinishke qaraı, ádette erekshe balanyń qas-qabaǵyna qarap otyrǵan analar úıinen erkin shyǵa almaıdy. Erekshe balaǵa erekshe kútim kerek qoı. Mine, sondyqtan biz osyndaı is-sharany jylyna eki márte uıymdastyryp, analardy tekserýden ótkizemiz, – deıdi №6 qalalyq aýrýhananyń dırektory Dınara Baıserkına.

Aksııaǵa birinshi ret kelip otyrǵan qala turǵyny Botagóz Aqmanova qoldan kelse, osyndaı is-sharalardan qalmaıtynyn aıtty.

– Áne-mine degenshe balam da 16 jasqa kelipti. Densaýlyǵyna qaraı birinshi topta. Aqyl-esi damyǵan. Qazir segizinshi synypta oqıdy. Em alyp, ońaltýdan ótip jatyr. Aksııaǵa bizdi búgin múgedektigi bar balalar birlestigi shaqyrdy. Biz, árıne, bir kúnde tolyq tekserýden ótip, kezeksiz barlyq saraptamany qolǵa alǵanymyzǵa qýanyshtymyz. Reti kelse, keler joly da kelermiz. О́ıtkeni erekshe balaǵa qamqor analardyń birinshi kezekte ózi aýyrmaýy kerek, – deıdi ol.

Sonymen aksııaǵa jıylǵan qaýym ana men balaǵa arnalǵan is-sha­ra­lar jıirek uıymdastyrylsa, qa­lys qal­maýǵa tyrysatynyn aıtyp tar­qasty.