Aqshany depozıtte saqtaý – eń tıimdi jol. Ári qazir bazalyq paıyzdyq mólsherleme 16,75 paıyz (ıaǵnı qymbat) deńgeıinde tur, demek depozıttiń de ósimi táp-táýir bolady degen sóz. Bir aıda otandyq ekinshi deńgeıli bankterdegi depozıt kólemi 3,1 paıyzǵa, bir jylda 21,9 paıyzǵa ósip, bıyl sáýirdiń basynda 31,3 trln teńgege jetken.
Aı saıynǵy ósim boıynsha sektordaǵy eń iri on banktiń ishinde «Eýrazııalyq bank» kóshbasshy: kórsetkish birden 9 paıyzǵa ulǵaıyp, 1,8 trln teńgege jetti. Bir jyl ishinde bank óziniń depozıttik portfelin 72,5 paıyzǵa kóbeıtti, bul ekinshi deńgeıli bankter arasyndaǵy eń kúshti kórsetkishterdiń biri.
«Aıta ketý kerek, «Eýrazııalyq bank» jeke sektorda da, korporatıvtik segmentte de depozıtterin arttyrdy. Jeke tulǵalardyń depozıtteri bir aıda 12,9 paıyzǵa, (EDB úzdik ondyǵyndaǵy úzdik nátıje) 911,2 mlrd teńgege deıin ósti. Bir jylda kórsetkish 88,6 paıyzǵa ósti. Bıznes depozıtteri bir aıda 5,4 paıyzǵa, (bir jylda 59,3%) 933 mlrd teńgege deıin kóbeıdi. Osylaısha, kásipkerler de, turǵyndar da jınaqtaryn bankke senip tapsyrýǵa daıyn. Sonymen qatar banktiń turaqtylyǵy tek Qazaqstanda ǵana emes, Forbes.ru sarapshylary tarapynan da aıtyldy. «Eýrazııalyq bank» 2023 jyly kórshiles elderdegi eń senimdi 50 banktiń qataryna endi», dep derek keltiredi Ranking.
Depozıtterdiń aı saıynǵy ósimi boıynsha ekinshi orynda – Bereke Bank (burynǵy «Sberbank Qazaqstan»): 6,9 paıyzǵa kóbeıip, 1 trln teńgege jetti. Jeke tulǵalardyń qarjy ınstıtýtyndaǵy depozıtteri naýryzda 6,3 paıyzǵa, 235,9 mlrd teńgege deıin, zańdy tulǵalardyń depozıtteri 7,1 paıyzǵa, 782,4 mlrd teńgege deıin ósipti.
Sanksııalyq qysymnan shyqqan bank barlyq segmenttegi pozısııasyn belsendi túrde qalpyna keltirip, valıýtalyq operasııalardy oryndap jatyr. Eske salaıyq, bıyl naýryz aıynda AQSh Bereke Bank-ti sanksııalyq tizimnen shyǵarǵan bolatyn. Sanksııalardy alyp tastaýǵa aksıonerdiń jáne bank ataýynyń ózgerýi yqpal etti.
Úshinshi orynda – Kaspi bank: 6,4 paıyzǵa kóbeıip, 4,4 trln teńgege jetti (jyldyq ósim – 55,1 paıyz). Bul bank negizinen bólshek naryqtaǵy bank, halyqtyń depozıtteri qarjy ınstıtýtynyń depozıttik portfeliniń birden 87 paıyzyn enshileıdi. Jeke tulǵalardyń depozıti bir aıda 3,8 paıyzǵa ósip, 3,8 trln teńgege jetti. Jeke tulǵalardyń depozıttik portfeliniń jyldyq ósimi 53,5 paıyzǵa jetken.
«Jalpy, sektor boıynsha aı saıynǵy dınamıka boıynsha depozıtter kóleminiń ósimin 21 ekinshi deńgeıli banktiń 16-sy, al alǵashqy ondyqtaǵy 9 bank kórsetti. Jeke tulǵalardyń bank sektoryndaǵy depozıtteri bir aıda 2,6 paıyzǵa ósip, 17,2 trln teńgeni qurady, al zańdy tulǵalardyń depozıtteri, kerisinshe, 3,3 paıyzǵa azaıyp, 14,2 trln teńge boldy», deıdi sarapshylar.
EDB jıyntyq depozıttik portfelindegi jeke tulǵalardyń depozıtteriniń úlesi bir jyl burynǵy – 51 paıyz, bes jyl burynǵy – 49,2 paıyz jáne on jyl burynǵy 37,8 paıyzben salystyrǵanda rekordtyq 54,7 paıyz mejesine jetti.