Osy aıdyń basynda «Apple» álemdi jańa revolıýsııalyq ónimmen tańǵaldyrdy. Ol «Vision Pro» tolyqtyrylǵan shyndyq garnıtýrasy dep atalady. «WWDC 2023» konferensııasynda usynylǵan bul biregeı garnıtýra vırtýaldy álemde paıdalanýshylarǵa jańa múmkindikter ashady.
«Vision Pro»-nyń basty artyqshylyǵy – onyń ámbebap ınterfeısi. Ol 3D áserin keremet usynyp, vırtýaldy álemdi shynaıy etip kórsetedi. Paıdalanýshylar qımyl, daýys jáne kóz qımyldary arqyly qurylǵyny tolyǵymen basqara alady. О́nimniń taǵy bir ereksheligi – vırtýaldy kólemdi keńistikte bir ýaqytta birneshe qosymshany ashý múmkindigi bar. Garnıtýra korpýsyndaǵy «Digital Crown» dóńgelegi paıdalanýshylarǵa terezelerdiń ornalasýyn, sonyń ishinde olardyń keńistiktegi tereńdigin retteýge múmkindik beredi. Sonymen qatar «Vision Pro» qoldyń, saýsaqtardyń jáne kózdiń qozǵalysyna jaýap beretin kontrollerlerdi qajet etpeıdi.
Garnıtýranyń taǵy bir qyzyqty múmkindigi – «EyeSight». Ol syrtqy álemmen qarym-qatynas jasaǵanda paıdalanýshylardy korpýsta kórsetedi. «Vision Pro» arqyly siltemelerdi bir ýaqytta ashyp, «Safari» braýzerinde jumys isteýge, sondaı-aq «MacBook» ekranyn vırtýaldy keńistikke qoldanýǵa ári qalaǵan jerge jyljytyp ornalastyrýǵa bolady. О́nimniń ózge múmkindikteriniń qatarynda fılmderdi 3D formatynda kórý, panoramalyq fotosýretterdi qaraý, sondaı-aq vırtýaldy keńistiktegi úsh ólshemdi nysandardy qoldaıtyn júzdegen qosymshany paıdalaný múmkindigin jatqyzýǵa bolady.
«Vision Pro» garnıtýrasy jeńil ári berik materıaldardan jasalǵan. Bul paıdalaný kezinde jaılylyq pen beriktikti qamtamasyz etedi. Sondaı-aq ol joǵary sapaly «microLED» dıspleılerimen jabdyqtalǵan. Olar 23 mıllıon pıksel ajyratymdylyǵymen móldir sýretti usynady. «LiDAR»-dy qosa alǵanda, 12-den astam kamera men jetildirilgen sensor «Vision Pro»-ny paıdalanýshynyń egjeı-tegjeıli sandyq avataryn jasaıdy, ony kóptegen qosymshada qoldanýǵa múmkindik beredi.
«Vision Pro» qaýipsizdigi úshin «Optic» ID tehnologııasy qoldanylady. Garnıtýra qurylǵynyń ıesin kózdiń torly qabyǵyn skanerleý arqyly tanıdy. Barlyq bıometrıkalyq aqparat shıfrlanǵan jáne qupııalylyqty qorǵaýdy qamtamasyz etý úshin barlyq aqparat qurylǵynyń ózinde qalady.
2024 jyldyń basynda «Vision Pro» satylymǵa shyǵady. Ol 3 499 dollarǵa baǵalanyp otyr. Alaıda osy ýaqytqa deıin «Apple» óziniń dúkenderinde demonstrasııalyq aımaqtardy ashady. Onda adamdar garnıtýrany synap kórip, onyń keremet múmkindikterin baǵalaı alady.
Qysqasy, «Vision Pro» paıdalanýshylarǵa biregeı ári tolyǵymen jekeshe tájirıbe usyna otyryp, tolyqtyrylǵan shyndyq aımaǵyna revolıýsııalyq ózgerister engizedi. Bul gadjettiń kómegimen vırtýaldy álemdegi adamnyń múmkindikteri shynymen sheksiz bola túsetini anyq.
Dıdar SERIKOV,
L.N.Gýmılev atyndaǵy
EUÝ stýdenti