Ulttyq qundylyqtarymyzdyń biri de biregeıi – bata berý dástúrin dáripteý, ýaqytpen úndestire jańǵyrtý, keıingi urpaqqa úlgi etý maqsatynda Taraz qalasynda dástúrli «Batamenen el kógerer» atty baıqaý ótti.
Taǵylymy mol sharaǵa oblys ákimdiginiń qoldaýymen óńirdegi ardagerler jáne bıler keńesi uıytqy bola bildi.
Sharany ashqan Jambyl oblystyq máslıhattyń tóraǵasy Ábdáli Nuralıev, oblystyq ardagerler keńesiniń tóraǵasy Erkimbek Soltybaev bata berý – jaqsy nıet, ónegeli ósıet bildirýdiń ulttyq dástúri ekendigin aıta kelip, batagóı qarııalarǵa sáttilik tiledi.
Qazaqy shapandaryn ıyqqa jaýyp ortaǵa shyqqan qarııalarymyz sahna sánin kirgizdi, sheshendik ónerlerin pash etti. Jınalǵan kópshilik ejelgi dástúrdiń jandanǵanyna qýandy.
Batagóılerdiń ónerin saraptaı kelip, Qazaqstannyń Qurmetti jýrnalısi, Qazaqstan Jýrnalıster odaǵy oblystyq fılıalynyń tóraǵasy Jańabaı Mıllıonov bastaǵan qazylar alqasynyń uıǵarýymen «júzden júırik shyqqan» Jýaly aýdanynyń batagóıi Seıitqazy Medetbekov bas júldege laıyqty dep tanyldy.
Birinshi oryndy Shý aýdanynan kelgen Saılaýbek Qalıev jeńip alsa, ekinshi oryn tarazdyq Isan Tilegenovke buıyrdy. Al júldeli úshinshi oryndy Jambyl aýdanynyń qarııasy Orynbaı Rysbaev ıelendi.
Is-sharany oblys ákiminiń orynbasary Erjan Úısimbaev qorytyndylap, oblys ákimi Nurjan Nurjigitovtiń quttyqtaý hatyn oqyp berdi.
Baıqaýdy tamashalaýǵa kelgen jas kórermender, danagóı qarttarymyzdyń ónegeli ómirin úlgi ete otyryp, ǵıbrat bolarlyq sózderin boılaryna sińire aldy dep oılaımyz.
Sondaı-aq asyl qazyna – qarııalarymyzdyń boıyndaǵy qasıetterin dáripteý arqyly jastardy ımandylyqqa tárbıeleý, úlkenge qurmet, kishige izet kórsetýdi úıretýde mundaı is-sharalardyń yqpaly mol ekenine taǵy bir ret kóz jetkizgendeı boldyq.
Ataly sózder aıtylyp, maǵynaly batalar berilgen merekelik is-shara ultymyzdyń qundylyqtaryn dáripteý, keıingi jastarǵa osy dástúrdi jańǵyrtyp, olardy ımandylyqqa tárbıeleýmen este qaldy.
Aldaberdi MAQAShEV,
Taraz qalalyq ardagerler keńesiniń múshesi