Eýropanyń ońtústik-shyǵysynda Kosovo degen shaǵyn ǵana el bar. Atalǵan memlekettiń negizin albandar (90%) quraıdy. Odan bólek, ol jerde serbter, syǵandar, bosnııalyqtar, kosovolyq túrikter, taǵy basqa ulttar men ulystar qonystanǵan. Kosovo 2008 jyly Serbııadan bólinip shyǵyp, óz táýelsizdigin jarııalady. Olardy AQSh, Ulybrıtanııa, Túrkııa, Fransııa, Germanııa, Italııa syndy alpaýyttar bastaǵan 90-ǵa jýyq memleket qoldasa, 73 memleket moıyndaýdan túbegeıli bas tartty.
Kosovonyń nebári 2 mıllıonǵa jete-jetpes turǵyny bar. Jer kólemi bar-joǵy 10 887 sharshy shaqyrymdy quraıdy. Soǵan qaramastan, bul eldiń sportshylary óte myqty. Ásirese, dzıýdoshy qyzdarynyń tabysy tolaǵaı. Aınaldyrǵan 15 jyl aralyǵynda atalǵan memleketten Olımpııa oıyndarynyń úsh jeńimpazy shyqty. Olardyń barlyǵy da tatamıdiń has sheberleri. Árıne, bul nátıjege tańdanbaý múmkin emes.
Áńgimemizdi Maılında Kelmendıden bastaǵanymyz jón. 1991 jyldyń 9 mamyrynda Pech qalasynda dúnıege kelgen balýannyń peshenesine óz eli tarıhyndaǵy tuńǵysh álem jáne Olımpıada chempıony ataný baqyty buıyrǵan eken. 52 kılo salmaq dárejesinde beldesken ol jastaıynan talantymen daralandy. Alǵashynda Albanııanyń sapynda óner kórsetip, baıraqty básekelerde júlde alyp júrgen kezinde Kelmendıge: «Bizdiń eldiń namysyn qorǵasań, úlde men búldege oraımyz», degen syńaıda kóptegen usynys tústi. Biraq ol bas tartty. Jıi-jıi mazalaǵan túrli federasııanyń basshylary men bapkerlerine Maılında: «Erteńgi kúni Kosovo táýelsizdigin alady. Sol kezde men óz elimniń gımnin shyrqatyp, týyn kókte jelbiretkim keledi. Meniń maqsatym da, armanym da sol», dep jaýap qaıtardy.
О́ziniń sporttyq karerasynda Maılında Eýropa chempıonatyn úsh ret utyp, bir ret qola medal aldy. 2013 jyly Rıo-de-Janeıroda, 2014 jyly Chelıabide uıymdastyrylǵan álem chempıonattarynda qarsylas shaq keltirmedi. 2019 jyly Tokıoda úshinshi satyǵa taban tiredi. 2016 jyly Rıo Olımpıadasynda altynnan alqa taqty. 2019 jyly Mınskide Eýropa oıyndarynyń jeńimpazy atandy. Kelmendı óz salmaq dárejesinde uzaq ýaqyt boıy álemdik reıtıngte jeke-dara kósh bastap turdy.
2021 jyly Tokıoda alaýy tutanǵan Olımpııa oıyndarynda Kosovanyń eki dzıýdoshysy altyn tuǵyrdan qol bulǵady. Áýeli 48 kılo salmaqta baq synaǵan Dıstrııa Krasnıchı aldyna jan salmady. 27 jastaǵy balýannyń odan bólek, álem chempıonatynyń eki dúrkin qola júldegeri, Eýropa chempıony jáne sol jarystyń úsh dúrkin júldegeri degen ataǵy bar. Kóp keshikpeı 57 kılo salmaqtaǵy Nora Gıakova bas júldeni oljalady. 30 jastaǵy tatamı sheberi álem men qurlyq birinshilikterinde jáne Eýropa oıyndarynda birneshe márte júldegerler sanatynan kórindi. Eýropa chempıonatynda altyn medaldi moınynda jarqyratty.
Kún ótken saıyn álemdik reıtıngte kosovolyqtardyń qatary kóbeıip keledi. Máselen, 52 kılo salmaqta Dıstrııa Krasnıchıdiń aldyna eshkim túse alar emes. 57 kılo salmaqta kúresip júrgen Nora Gıakova jetinshi oryndy ıelenýde. 63 kılolyq Lora Fazlıý segizinshi satyǵa jaıǵasty. Olardyń izin basyp Loha Flaka (57 kılo) men Lorıana Kýka (78 kılo) bastaǵan bir shoǵyr daryndy jas ósip keledi.
Kezinde tek Maılında Kelmendıge ǵana emes, Dıstrııa Krasnıchı men Nora Gıakovaǵa da joǵarydaǵydaı usynys túsken. Árıne, óz órenderin jastaıynan jaqsylap tárbıelep, durystap baptap, asa iri halyqaralyq jarystarda el namysyn abyroımen qorǵaıtyndaı deńgeıge jetkizý ońaı sharýa emes. Sol sebepti de kóptegen maman jeńil jolmen júrgendi jón kóredi. Olarǵa kún demeı, tún demeı eńbektenip, jattyǵý zalynda shelektep ter tógip, júıkelerin juqartqannan góri, daıyn sportshyny qatarǵa qosa salý áldeqaıda tıimdi. Biraq Maılında da, Dıstrııa da, Nora da aqshaǵa qyzyǵyp, Otanyn tastap ketken joq. Olar óz eliniń múddesi men halqynyń qalaýyn bárinen joǵary qoıdy. Mine, sonyń arqasynda búgingi tańda dzıýdodan Kosovonyń áıelder quramasy álemdegi eń úzdik komandalar sanatyna erkin qosylyp otyr.