Bala kezimnen kórshi-kólemge, múmkindigi shekteýli jandarǵa, jan-janýarlarǵa kómektesýge umtylatynmyn. Shynymdy aıtsam, men muny volonterlik dep eseptemedim. Bul uǵymnyń da ne ekenin bilmedim. Tek volonterlik qozǵalys quramyna qosylǵan soń ǵana, bul iske tereńnen úńile bastadym.
Jıǵan bilimińmen bólisesiń, keıin janyńa senimen rýhtas, senimen úndes adamdar shoǵyrlana bastaıdy. Mine, bul zııatkerlik volonterlik dep atalady. Negizi kóp adam ózderiniń jasap jatqan kómekterin eriktilikpen aınalysyp jatyrmyn dep eseptemeıdi. Sondyqtan mundaı keń aýqymdaǵy forýmdar eriktiliktiń ermek emes ekenin, onyń mán-mazmunyn jan-jaqty túısinýge járdem beredi.
Pandemııa kezinde de ortadan qalys qalmadyq. Kóp iske jan bitirdik, dem berdik. Dári-dármekten bastap, erekshe jandarǵa arba tasýmen aınalystyq. Bilim adamnyń sanasyna máńgige saqtalady, adamdarǵa ómir boıyna qalatyn azyq qaldyrǵym keldi. Meniń qazirgi baǵytym – zııatkerlik volonterlik.
Aıta ketetin bir usynysym. Eldegi volonterlikte júıeli baılanys joq. Volonterlik qyzmet – óz erkińmen baratyn qaıyrymdy is-shara. Degenmen bul júrek qalaýynyń qyzmeti qazaq halqynyń qoǵamdyq-áleýmettik ómirinde ejelden kele jatqan – jylý jınaý nemese asar jasaý dástúrleriniń tarıhı jalǵasy. Tabıǵat apatynan nemese ózge de baqytsyzdyq saldarynan baspanasynan, mal-múlkinen aıyrylǵan otbasyna aýyl bolyp kómektesýdi qazaqta «jylý jınaý» dep te aıtady. Qoǵam muny umytqan da syńaıly. Demek bala kezinen ár janǵa bul álemde jalǵyz emes ekenin sezindiretindeı tárbıe berý kerek. «Jumyla kótergen júk jeńil» ekenin uǵyndyrý qajet. Tálim-tárbıemen boıyna sińgen dúnıeniń tamyry úzilmeıdi. Biz osy tusymyzdy shetelge úlgi ete alamyz.
Zahıra BEGALIEVA,
«IteachMe» qorynyń dırektory, ınklıýzıvti volonter