Qazaq etnografııasyn alǵashqylardyń biri bolyp zerttegen Qazaqstandaǵy etnograftar mektebiniń negizin qalaýshy, tarıh ǵylymdarynyń doktory, professor Halel Arǵynbaev. Bul týraly «Egemen Qazaqstan» gazetiniń tilshisi «Qazaq etnografııasynyń shyraqshysy» maqalasynda jazdy.
Halel Arǵynbaev Alash ardaqtysy Júsipbek Aımaýytulynyń eli – Áýlıeli Qyzyltaýda dúnıege kelgen. Tirisinde etnografııa salasynyń kóshbasshy ǵalymy atanyp, sońyna eleýli zertteý eńbekterin qaldyrdy.
«Qazaq etnografııa ǵylymy Halekeńnen bastalady. Halekeń úlken kitap túgili, ár maqalasyna barynsha jaýapty qaraıtyn, ǵylymdaǵy asyǵystyqqa qarsy adam edi. Ol jaǵynan Halekeńdi ǵylymdaǵy akademııalyq dástúrdiń ókili dep tolyǵymen ataýǵa bolady. Biz kandıdattyq dıssertasııamyzdy otyzǵa jeter-jetpeste asyǵyp qorǵap jatqanymyzda, ol kisi óziniń 36 jasynda alǵashqy ǵylymı ataǵyn qorǵaǵan», dep jazǵan belgili ǵalym Jambyl Artyqbaev.
Sondaı-aq ǵalym Halel Arǵynbaevty Sh.Ýálıhanovtyń, onyń dosy N.Potanınniń jolyn jalǵastyrýshy dep aıtýǵa bolatynyn aıtty.