Ulttyq sport – ıdeologııalyq qural

Alqaly jıynda Memleket basshysy Ádiletti Qazaqstandy qurý úshin qaı baǵytta qandaı qadamdar jasaýymyz qajettigine toqtaldy. Ásirese «Adal azamat» uǵymy maǵan erekshe áser etti. Rasynda, elimizde zań, tártip, senim jáne jaýapkershilik ústemdik qurǵan jańa qoǵamdyq etıka qalyptassa, árbir qazaqstandyq otan­shyldyq, adamgershilik, bilimpazdyq, eńbek­­qorlyq, janashyrlyq sııaqty izgi qaısetterdi boıyna jınaqtaǵan adal azamat bolýǵa umtylsa, sapaly ult, qýatty el bolarymyz sózsiz. Memleket basshysynyń bul oıy Ál-Farabı babamyzdyń «Qaıyrymdy qala turǵyndary» tujyrymdamasymen ushtasyp jatyr.

Sondaı-aq qoldanystaǵy ordenderdi halyqqa qurmetti tulǵalardyń esimimen almastyrý týraly usynys ta óte mańyzdy dep esepteımin. Bul jas urpaqqa elge qyzmet etken oǵlandarymyzdy nasıhattaý úshin qajet. Prezıdent óskeleń urpaqtyń tárbıesine erekshe toqtaldy. «Balalar kitaphanasy» atty jańa jobany qolǵa alý, táýlik boıy jumys isteıtin kitaphana ashý týraly ıdeıa – ǵajap ıdeıa. О́ıtkeni kitap oqyǵan bala jamandyqqa barmaıdy, adal azamatqa tán qasıetterdi boıyna jınaqtaıdy. Jańa Qazaqstannyń jańa shejiresin jazý, kınoındýstrııany ekonomıkanyń jeke tarmaǵy retinde qarastyrý, aýyldardy kóterý qajettigin de jan-jaqty taldap, túsindirdi.

Prezıdent aıtqan taǵy bir másele – dástúrli qundylyqtarymyzdy qazirgi mádenı úrdistermen úılestirý. Bul rette, Ulttyq sporttyń ıdeologııanyń myqty quraly ekenin aıtqym keledi. О́ıtkeni ata-babamyzdan mura bolyp qalǵan Ulttyq sport jastardyń basyn biriktiredi, olardyń janyn da, tánin de shynyqtyrady, patrıotızmge, ultjandylyqqa tárbıeleıdi. Memleket basshysy kelesi jyly ótetin V Dúnıejúzilik kóshpendiler oıynyn joǵary deńgeıde ótkizý týraly tapsyrma berdi. Kóshpendiler oıyny jyldan-jylǵa qarqyn alyp keledi. Bizdiń elde ótetin bul baıraqty dodaǵa álemniń 100-den astam elinen 5 myńǵa jýyq sportshy, 15 myńnan asa týrıst keledi dep josparlap otyrmyz.

Islambek SALJANOV,

Ulttyq sport qaýymdastyǵynyń prezıdenti