Premer-mınıstrdiń orynbasary – eńbek jáne halyqty áleýmettik qorǵaý mınıstri Tamara Dúısenovanyń baıandaýynsha Respýblıkadaǵy áleýmettik qoldaý máseleleri bir qujat – Áleýmettik kodekspen retteledi. Ol 1 shildeden bastap kúshine enedi, dep habarlaıdy Egemen.kz.
Áleýmettik kodeks týǵannan bastap kámelettik jasqa jetkenge deıin áleýmettik qoldaý kórsetý, jumysqa ornalastyrý, eńbek qaýipsizdigi, áleýmettik saqtandyrý, qıyn ómirlik jaǵdaı kezinde kómek kórsetý, qarttardy qoldaý jáne t.b. máselelerdi qamtıdy.
Mınıstrdiń baıandaýynsha, ana men balany áleýmettik qorǵaýdy kúsheıtý maqsatynda birqatar qosymsha shara qarastyryldy. Máselen, jyl basynan beri bala kútimi boıynsha beriletin tólem merzimi 1,5 jasqa deıin ulǵaıtyldy. Búgingi tańda 450 myńnan astam otbasy atalǵan kómekti aldy.
1 shildeden bastap «Altyn alqa», I jáne II dárejeli «Ana dańqy» ordenimen marapattalǵan, «Batyr ana» ataǵy bar kópbalaly analarǵa tólenetin járdemaqy mólsheri de ulǵaıady. Bul sharamen 90 myńǵa jýyq áıel qamtylmaq.
Sondaı-aq Kodekste múgedektigi bar azamattarǵa kóp kóńil bólindi. Atap aıtqanda, múgedekterge, olardyń qamqorshylaryna jáne asyraýshysynan aıyrylǵan otbasylarǵa tólenetin járdemaqy mólsheri 14,5%-ǵa artady. Járdemaqy mólsheriniń jyl basynda 8,5%-ǵa ulǵaıǵanyn eskere otyryp, tólemder somasy jalpy 23%-ǵa óspek.
Jalpy jańa Áleýmettik kodekstiń osy jáne basqa da kóptegen normasy azamattardyń ál-aýqatyn arttyrýǵa jáne áleýmettik táýekelderdiń aldyn alýǵa baǵyttalǵan.