Birinshi kezekte – halyq múddesi

Sońǵy saılaýdyń ózgesheligi nede? Biz Parlament pen máslıhattar saılaýlarynda sheteldik úlgilerdi qolǵa alyp jatyrmyz. Elimizde partııalyq júıe endi ǵana damyp keledi. Biraq áli tolyqqandy qalyptasty dep aıta almaımyn. Mysaly, bizden bólek bılik partııasyna jatpaıtyn depýtattar bar. Olar bizge qaraǵanda anaǵurlym belsendi bolýy kerek. Biraq osy belsendilik tıisti deńgeıde kórinbeı jatyr. Sondyqtan partııalyq júıe áli jetkilikti jumys istep jatqan joq.

Jańa ózgeristerge saı halyq saılaǵan depýtat adamdardyń kóńi­linen shyqpasa, ony keıin qaıtaryp alýǵa bolady. Alaıda qazirgi tańǵa deıin ondaı jaǵdaı tirkelgen joq. Degenmen óńirimizde bir depýtatty saılaýshylar qatty synady. Endi biz budan bir nátıje kútip otyrmyz: ne ol ózin aqtap shyǵýy kerek, ne ketýi qajet. Sondyqtan men muny jaqsy ózgeris dep aıta alamyn. Kimde-kim óziniń bergen ýádesin oryndamasa, aıtqan sózin iske asyrmasa, ómirdegi júris-turysy durys bolmasa, olardy keıin shaqyryp alady. Kóppartııalyq júıe osyǵan barynsha oń yqpal etedi dep senemin.

Qazir depýtattyq qyzmetke ha­lyq­qa qyzmet jasaımyn degen shyn nıeti bar adamdar kelgeni abzal. Burynǵydaı tender alamyn, bızne­simdi júrgizemin degen zaman ótti. Iаǵ­nı qazirgi tańda bul qyzmetke óziń­niń emes, halyqtyq múdde úshin barý qajet.

Buryn jaryq, jylý jáne gaz salalaryndaǵy monopolısterge jer­gilikti depýtattardyń tisi batpaıtyn. Depýtattar da monopolısterge qarsy kúresti bastap jatyr. Máselen, bir ǵana oqıǵany aıtaıyn, Ordabasy aýdanynda bir kásipker qysh zaýytyn ashyp, 3 shaqyrym jerden jaryq tartqan. Jumysyn bastaǵannan keıin onyń janynan taǵy bir bıznes ashady. Endi oǵan óziniń tartqan jelisinen tok júrgizeıin dese, monopolıst 6 sha­qyrym jerden taǵy elektr qýatyn tart dep turyp alypty. Sodan álgi kásipker partııa qabyldaýyna keldi. Biz iske aralasqannan keıin ǵana bul másele oń sheshildi. Depýtattar qaýymy osylaı halyq ıgiligi úshin jumys júrgizýi kerek.

Dýlat ÁBISh,

Túrkistan oblystyq máslıhatynyń depýtaty