Forým aıasynda barlyq deńgeıdegi Májilis jáne máslıhattardyń depýtattary Astana qalasyna jınalyp, partııa basshylyǵymen bas qosty. Birinshiden, saıası is-shara – elimizdegi túıini áli kúnge deıin tarqamaǵan problemalardy talqylap, sol másele týrasynda óz oıyn, usynys-pikirin ashyq aıtýǵa degen óte jaqsy múmkindik.
Ekinshiden, munyń aldynda bolǵan Konstıtýsııalyq reformaǵa baılanysty máslıhattardyń da, Májilistiń de quzyrettiligi artty. Áýeli máslıhatqa toqtalsaq, buryn máslıhat hatshysy desek, búginde máslıhattyń tóraǵasy dep ózgertildi. Bul tek atynyń jańarýy ǵana emes, onyń mazmunynyń jańǵyrýyna ákelip jatyr. Máselen, munyń aldynda máslıhattardyń depýtattary qyzmetterin qoǵamdyq qosymsha júkteme retinde alyp júretin. Saldarynan kóp máselemen aınalysýǵa ýaqyty bolmaıtyn. Qazir máslıhattyń turaqty komıssııalarynan kem degende eki tóraǵa tolyǵymen tańerteńnen keshke deıin jumys istep máslıhatta otyrady. Mine, muny men múmkindiktiń keńeıýi, quzyrettiń artýy dep uǵamyn. О́ıtkeni olar qazir bıýdjetpen aınalysýǵa, shyǵys-kiristerin tolyqqandy qarap, zertteýge, qajet kezinde batyl saýal qoıa bilip, tıisti usynystar aıtýǵa, ózindik sheshimder qabyldaýǵa múddeli dep sanaımyn.
Sondyqtan respýblıkalyq deńgeıde uıymdastyrylǵan forýmǵa elimizdiń ár buryshynan jıylǵan azamattar qaımana qazaq qamy úshin naqty bir problemalardy kóteredi dep sanaımyn. «Amanat» partııasynyń alańynda aıtylǵan usynystar óz sheshimin tabady dep úmittenemin.
Ashat AIMAǴAMBETOV,
Májilis depýtaty