Mońǵolııanyń Ulan-Batyr, Nalaıh, Hovda, Baıan-О́lgeı aımaqtarynda jalǵasqan qazaqtar kezdesýi Altaı Respýblıkasy Qos-Aǵash aýdanyna jetti, dep jazady Egemen.kz.
Orys, altaı, qazaq halyqtarynyń tatýlyqty tý etken mekeninde quramynda Otandastar qorynyń prezıdenti Abzal Saparbekuly jáne Parlament depýtattary Ǵalıasqar Sarybaev pen Bolat Kerimbek pen bártop zııaly qaýym ókilderi bar resmı delegasııany Qos-Aǵash aýdanynyń ákimi Serikjan Murathanuly men aýdan máslıhaty tóraǵasy Sanash Dıdýnov shekara shebinen qarsy alyp, Altaı qazaqtarynyń murasy saqtalǵan Jańa aýyl eldimekenine alyp bardy. Delegasııa músheleri óńirdiń turmys-tirshiligimen tanysyp, osyndaǵy ulttyq qundylyqtar dáriptelgen murajaıdy aralady.
Altaı Respýblıkasynda aýmaǵy jaǵynan eń úlken jáne úsh birdeı elmen shekaralas jatqan (Mońǵolııa, Qazaqstan, Qytaı) Qosaǵash aýdanynyń halqy qazaqy dástúri men saltyn jaqsy saqtaǵan. Atap óterligi Reseıdegi qazaq tilinde 1-5 synyptarǵa arnalǵan oqýlyq ótken jyly osy jerde ustazdardyń uzaq jylǵy eńbegimen ótken jyly osy aýdanda qoldanysqa endi.
Halyqpen kezdesý, turǵyndarmen tildesý aýdan ortalyǵynda ornalasqan saıabaqta resmı delegasııamen qatar júrgen Qaraǵandylyq «Táttimbet» atyndaǵy akademııalyq ulttyq aspaptar orkestrdiń saltanatty konsertimen jalǵasty. Atap óterligi bul sharalar Reseı halqynyń Otbasy kúnimen oraılas keldi.
Qazaqstan táýelsizdik alǵannan beri alǵash ret osy deńgeıde qazaqsha konsert tyńdaǵan Qos-Aǵashtyqtar erekshe qýanyshqa bólenip, kózderine jas aldy. Atamekennen alysta jatqan Altaı qazaqtarynyń kóńili marqaıyp, rýhy asqaqtap, Qazaqstanǵa duǵaı sálemderin jetkizdi.
Shara sońynda aımaq halqynyń birligi, qazaq tilin saqtaý jolynda aıanbaı eńbek etip júrgen Qos-Aǵashtaǵy qazaq mádenı ortalyǵynyń basshysy Arqalyq Sultanov QR Prezıdenti Qasym-Jomart Toqaevtyń tós belgili Alǵys hatymen marapattaldy. Sonymen qatar aýdan ákimi Serikjan Murathanuly men aýdan májilis tóraǵasy Sanash Dıdýnovqa «Otandastar Qory» alǵys haty jáne «Alǵys» estelik medali tabys etildi.
Basqosý aıaqtalyp, delegasııa quramy elge qaıtar tusta «Qazaqstan ketip bara jatyr» - dep qushaqtap, qımastyqtyń kóz jasyna erik bergen turǵyndar, uzaq ýaqyt kóz almaı jolǵa shyqqan kólikke qarap turdy.