Memleket saıası reformalar aıasynda sóz bostandyǵyn qorǵaý úshin qajetti sharalar qabyldap jatyr. Azamattardyń aqparatty erkin alýy, pikirin ashyq jetkizýi, oı erkindigi – Ádiletti Qazaqstannyń aıqyn kórinisi.
Zaman talabyna saı, qazir qoǵamnyń suranysy kúsheıdi. Halyq bılikten bergen ýádeleriniń ýaqytynda ári sapaly oryndalýyn, reformalardyń naqty nátıjesin taǵatsyzdana kútip otyr. Rasynda, reformalardyń nátıjesin kórmek kerek, áserin sezbek kerek. Sonda ǵana halyqtyń bılikke senimi kúsheıedi. Osy tusta elge jetetin aqparattyń naqty ári senimdiligi úlken ról atqarady. Keıingi ýaqytta áleýmettik jeliler negizgi aqparat kózi men qoǵamdyq-saıası baǵytty qalyptastyratyn platformaǵa aınaldy. Álemde áleýmettik jeli arqyly jańalyqpen tanysý 30 paıyzǵa ulǵaıǵanyn kórip otyrmyz. Eýropa elderi bul baǵytta tıesili zańdaryn áldeqashan qabyldady. Memlekettik múdde men aqparat quraldary bite qaınasyp jatqan uǵym. Eýropadaǵy demokratııalyq júıeniń de myzǵymastyǵynyń kúndelikti saqshylary – jýrnalıster qaýymy.
Álemdik zaıyrly qoǵam tarıhyna úńilsek, eń aldymen, eldiń kórkeıýi sóz qadirin baǵalaýdan bastalady eken. Fransııa men Ulybrıtanııany alaıyq. Osy alyp eki memlekettiń myńjyldyq adamy bolyp Napoleon Bonapart pen Ýınston Cherchıll tanylǵan. Ekeýi de ómir jolyn jýrnalıstıkadan bastaǵan. Barlyq reformasyn aqparat quraldaryna súıenip, solardyń qoldaýymen júzege asyrǵan. Napoleonnyń «Azamattyq kodeksin» búgingi kúnge deıin qoldanysta bolýy sóz ben istiń birizdiliginen.
«Ádiletti Qazaqstandy qurý mınıstrler men ákimderdiń ǵana mindeti emes. Oǵan búkil qoǵam bolyp jumylýymyz kerek. Al túpki maqsatymyzǵa jetý úshin saıası-ekonomıkalyq reforma jasaý jetkiliksiz. Bastysy, ár azamattyń sana-sezimi jańǵyrýy qajet. Halqymyzdyń dúnıetanymy jáne ómirlik ustanymdary ózgerýge tıis. Áıtpese, basqa reformanyń bári beker. Bir sózben aıtsaq, pıǵyl ózgermese, eshteńe de ózgermeıdi». Bul – Memleket basshysy Qasym-Jomart Toqaevtyń Túrkistanda ótken Ulttyq quryltaıda aıtqan sózi.
Prezıdent «Onlaın-platformalar jáne onlaın-jarnamalar týraly» Zańǵa qol qoıdy. Bul zań ómirimizge úlken oń ózgerister engizedi. Jalpy, bul qujat birinshi kezekte azamattardyń quqyǵyn qorǵaýǵa, onlaın ortany qaýipsiz jáne ashyq túrde damytýǵa baǵyttalǵan. Qazaq – sóz qadirin biletin, oryndy sózge toqtap, «at-shapan aıybym» dep káde jasaıtyn halyq. Ata dástúrmen onlaındaǵy sózimizdi túzesek, naqty ómirdegi isimiz de alǵa basady.
Mahat SADYQ,
jýrnalıst