Senat jáne Májilis depýtattary óńirlerde saılaýshylarmen kezdesip, olardyń muń-muqtajyn tyńdap, Parlamentte qabyldanyp jatqan zańdar tóńireginde oı bólisti.
Senat depýtaty Evgenıı Bolgert Qaraǵandy oblysynda Qazaqstan halqy Assambleıasynyń, Kásipkerler qaýymdastyǵynyń ókilderimen jáne jastarmen kezdesti.
Kezdesý barysynda bıznestiń quqyqtary men múddesin qorǵaý, kásipkerlik salasyndaǵy ınnovasııalyq jobalardy iske asyrýǵa qoldaý jasaý, etnostardyń tarıhı shyqqan elderinen Qazaqstanǵa ınvestısııa men tehnologııa tartý jónindegi usynystardy tyńdady. Evgenıı Bolgert VIII shaqyrylymdaǵy Senattyń birinshi sessııasynyń qorytyndylary týraly aıtty.
Depýtat nemis mádenı ortalyǵyna baryp, nemis jastar klýbynyń qyzmetkerlerimen, ókilderimen kezdesti. Qazaqstan halqy Assambleıasynyń XXXII sessııasynyń qorytyndysy boıynsha qabyldanǵan sheshimderdi habardar etý, sondaı-aq mádenı ortalyqtyń odan ári jumysy, ınstıtýsıonaldyq nyǵaıtý, óńirdegi jobalyq jumysty iske asyrý máseleleri kezdesýdiń negizgi taqyryby boldy. E.Bolgert sapar barysynda «Saryarqa» arnaıy ekonomıkalyq aımaǵyn aralady.
* * *
Májilis depýtattary Aına Mysyrálimova men Natalıa Dementeva Aqkól qalasyndaǵy medısına qyzmetkerlerine arnalǵan emdeý-saýyqtyrý ortalyǵynyń qurylysymen tanysty.
Búginde ońtústik emdeý korpýsynyń, qonaq úıdiń jáne basseınniń qarqyndy qurylys jumysy júrip jatyr. Ony kelesi jyldyń sońyna deıin paıdalanýǵa berý josparlanǵan. О́z kezeginde, depýtattar medısına qyzmetkerleri memlekettiń erekshe qamqorlyǵynda bolýy kerek ekenin atap ótti.
Depýtattar 1000-ǵa jýyq turǵyny bar Dombyraly kentindegi sý qubyry jelilerin jóndeý jumysymen tanysty. Kenttegi 16 shaqyrymdyq sý qubyry isten shyqqan soń, 2 myń metrden astam jańa qubyr salynyp, 40-tan astam qudyq ornatyldy.
Sonymen qatar Aına Mysyrálimova « Amanat» partııasynyń Aqmola oblystyq fılıalynyń alańynda azamattardy qabyldady. Kókshetaý turǵyndary jol salý, qoqys jınaý, kommýnaldyq ınfraqurylymdy jóndeý máselelerin kóterdi. Qoǵamdyq kólik máselesine de erekshe nazar aýdaryldy.
Depýtat bul másele Ishki ister mınıstrligimen birge muqııat zerdelenetinin atap ótti. Ásirese D sanatyndaǵy júrgizýshi ótiline qoıylatyn talaptardy tómendetý múmkindigi nazarǵa alynady.
* * *
Senat depýtattary Álı Bektaev pen Murat Qadyrbek óńirge sapar barysynda Saýran jáne Otyrar aýdandaryna bardy. Turǵyndarmen kezdesýde qubyrmen keletin sýdyń joqtyǵy, kópsalaly aýrýhana salý qajettigi, aýyldyq okrýgterde jer qoınaýyn zańsyz paıdalaný jáne basqa da mańyzdy máseleler kóterildi.
Depýtat Álı Bektaev aıtylǵan usynystarǵa jeke toqtalyp, senatorlar aldaǵy sessııa barysynda osy máselelerdi sheshýge yqpal etetinin atap ótti. Senatorlar Otyrar aýdanynyń Talapty eldi mekenindegi saılaýshylarmen kezdesýde VIII shaqyrylymnyń birinshi sessııasy barysynda Senat maquldaǵan zań shyǵarý qyzmeti men zańdar týraly egjeı-tegjeıli habardar etti. Depýtattar kezdesýlerdi qorytyndylaı kelip, usynylǵan árbir usynystyń mańyzyna toqtaldy jáne olardyń kezeń-kezeńimen sheshilýine yqpal etetinin jetkizdi.
* * *
Májilis depýtattary Atyraýda iri munaı-gaz kásiporyndary basshylarymen óńirdegi ózekti máselelerdi talqylady. Kásiporyndaǵy jumysshylardyń ótinishi boıynsha óndiriste vahtalyq aýysym ýaqytyn 14 kúnge aýystyrý, kógaldandyrý jumysyn jedeldetip, álemýettik-ınfraquryldymdyq damý baǵdarlamasyna bólinetin qarjyny kóbeıtý sııaqty birqatar máseleni kóterdi.
Baqtyqoja Izmuhambetov «Embimunaıgaz» AQ ujymymen kezdesip, zań shyǵarýshy organnyń jumysy men qabyldanyp jatqan zańdar týraly aqparat berdi. Jıynda depýtat onlaın-jarnama, shetelge shyǵarylǵan aktıvterdi elge qaıtarý týraly zańdardyń talaptary men tıimdiligi týraly aıtty. Sonyń ishinde «Aýyl amanaty» jobasynyń maqsat-mindetterine nazar aýdardy.
Dúısenbaı Turǵanov pen Ádil Jubanov osy óńirdegi iri munaı-gaz mekemeleriniń ujymdarymen kezdesti. Jıynǵa «Embimunaıgaz» AQ, «Teńizshevroıl» JShS jáne North Caspian Operating Company N.V. kompanııasynyń ókilderi qatysty. Onda áleýmettik ınfraqurylymdyq jobalar jáne kógaldandyrý taqyryptary qozǵaldy.