Balalardyń jazǵy demalysyn uıymdastyrý jeńil-jelpi qaraıtyn másele emes, ol – ári demalys, ári tárbıe. Mańǵystaýda lagerdi aıryqsha uıymdastyrýmen, oqýshylarǵa ulttyq qundylyqtardy úıretýmen tanymal bolǵan Túpqaraǵan aýdanynda Aqketik qalasynyń jaǵajaıynda shatyrly lager uıymdastyrylýda degen jańalyq qulaqqa tıdi. Jaqynda Mańǵystaý oblysy ákimdiginiń, oblystyq Bilim basqarmasynyń qoldaýymen, aýdandyq ákimdik pen bilim bóliminiń jumylýymen júzege asqan shatyrly lager jumysymen tanysyp qaıttyq.
Teńiz jaǵasyna tigilgen aqshańqan úılerde oqýshylar joryq jaǵdaıynda jaıǵasypty. Jetekshileriniń keńesimen keń shatyrlardyń ishine qaz-qatar salynǵan tósek-oryndaryn jınaǵan balalar teńizge shomylýǵa asyǵýda. Buǵan qarap olar úshin eń qyzyqty sátterdiń biri – tassyz, birazǵa deıin birqalypty tereńdikti saqtaıtyn altyn qumdy jaıdaq jaǵalaýy bar teńizge túsý sáti ekendigin birden ańǵarasyń.
– Lager 4 aýysymdy, 10-22 shilde aralyǵyn qamtıtyn lagerde ár aýysymda 90 baladan barlyǵy 360 oqýshy demalady. Lagerge aýdandyq jáne qalalyq bilim berý uıymdarynyń áleýmettik qoldaýǵa jatatyn otbasylardan 12-15 jas aralyǵyndaǵy balalar, sondaı-aq oblystyq Bilim basqarmasy quzyrynda uıymdastyrylǵan túrli týrıstik-ólketaný baǵytyndaǵy is-sharalardyń jeńimpazdary qatysýda. Maqsat – Túpqaraǵan aýmaǵyndaǵy Kaspıı teńiziniń qolaıly jaǵalaýyn balalar qajetine paıdalana otyryp, bilim alýshylardyń jazǵy demalysyn tıimdi, sapaly uıymdastyrý, – deıdi Túpqaraǵan aýdandyq bilim bóliminiń basshysy A.О́tesbaeva.
Týrıstik lager dep ataýy aıtyp turǵandaı, shatyrly lagerde demalýshylar demalysty elimizdiń tarıhy men mádenıetinen, jergilikti faýna men flora erekshelikterin, ekologııalyq etıkasyn, órt, sý qaýipsizdik erejelerin jáne lagerde júrip-turý sharttaryn oqyp-úırenýmen qatar, tabıǵatty qorǵaý, qubylnamamen baǵdarlaý, kartamen jumys isteý, kedergilerdi jeńý, shatyr ornatý, ot jaǵý, alǵashqy dárigerlik kómek kórsetý, shydamdylyq, eńbekqorlyq, ózara kómektesý, topta jumys isteı alý, tótenshe jaǵdaılarda óz-ózine qyzmet kórsetý jáne ómir súrý daǵdylaryn júzege asyrý maqsatynda biliktilik daǵdylaryn ıgeredi eken. Týǵan jer tabıǵatyn tanystyrý baǵytynda demalýshylar jergilikti mýzeılerge, Torysh tasty sharlar alqabyna, Saýra, Aqespe, Tamshyly shatqaldaryna saıahatqa shyǵyp, Aqtaý qalasyndaǵy «Tree of life» demalys ornynda demalady. Taǵy bir súısinerligi – demalýshylar shatyrly lagerde úsh kún boıy teledıdarsyz, gadjetsiz, oıyn, án-kúı, úırený-izdený baǵytynda naǵyz demalys sátterin bastan ótkeredi.
Balalardyń qaýipsizdigi, kóńildi lager tirliginen bireýiniń qaǵys qalmaı tolyqtaı ortaǵa tartylýy syndy asa jaýapty mindetti moıyndaryna alyp, quraq ushqan jap-jas jetekshilerge rıza boldym. Kaspııdiń jaǵalaýynda, altyn kúnniń astynda bir-birine qamqorlyq kórsetken qazaqtyń jas býyny lagerdiń shadyman shattyǵyna bólenýde.