Taıaýda Ál-Farabı atyndaǵy QazUÝ arheologtary erte temir dáýirine jatatyn otbasylyq qabirdi tapty. Jerleý rásimine qaraǵanda, bul qabirler ártúrli ýaqytta salynǵan. Ekspedısııa jetekshisi qorǵan úıindisiniń astynda taǵy da jerleý oryndary bolýy múmkin ekendigin aıtady. Keleshekte bul qorǵan tolyǵymen zerttelmek. Qazirgi ýaqytta barlyq oljalar dalalyq zerthanada aıqyndalyp jatyr. Tabylǵan arheologııalyq keshender jetisýlyq kóne turǵyndardyń zattyq jáne rýhanı mádenıetinen málimet beredi.
Osylaısha Ál-Farabı atyndaǵy Qazaq ulttyq ýnıversıtetiniń arheologııalyq ekspedısııasy tarıh ǵylymdarynyń doktory, qaýymdastyrylǵan professor Dosbol Baıǵunaqovtyń jetekshiligimen Almaty oblysy Talǵar aýdany Jańalyq aýylyndaǵy qazba jumystary kezinde erte temir ǵasyryna jatatyn otbasylyq qabirdi taýyp aldy.
Zertteý jumystary «Qazaqstannyń ońtústik-shyǵys jáne shyǵys aımaqtarynyń (Shý-Ile alqaby, Tarbaǵataı jáne Alakól oıysy) mádenı murasyn pánaralyq arheologııalyq jáne tarıhı-etnografııalyq zertteý» atty maqsatty qarjylandyrý baǵdarlamasy aıasynda júrgizildi.
Dalalyq jumystar barysynda aýyldyń ońtústik shetindegi Kishi Almaty ózeni jaǵalaýyndaǵy qorǵan zertteldi. Qorǵannyń dıametri – 30 m bolsa, bıiktigi – 0,5 m. Ortalyq bólikten 1,2 m tereńdikten bir deńgeıde jatqan, biraq jerleý rásiminde aıyrmashylyqtary bar eki qabir arshyldy.
Birinshi jerleý orny batystan shyǵysqa qaraı baǵyttalyp, usaq tastardyń ústinde jatyr. Jerlengen adamnyń bas jaǵyna janýarlardyń súıekteri, qumyralar, alasa shynyaıaqtar men tostaǵandar túrindegi qysh ydystar qoıylǵan. Sonymen qatar jerleý ornynan qola aına men altyn folgaǵa oralǵan monshaq, máıittiń sol jaǵynan 3 keramıkalyq buıym tabyldy. Jerleý shuńqyrynyń shyǵys bóliginde tonaý izi baıqaldy, buǵan qańqa súıekterdiń ǵana emes, áshekeı buıymdy quraǵan altyn monshaqtardyń kóp bóliginiń joqtyǵy aıǵaq bola alady.
Ekinshi jerleý orny birinshisinen ońtústikke qaraı 1,5 m jerde ornalasqan. Jerleýdiń tas tósendisi joq, ońtústik-batystan soltústik-shyǵysqa baǵyttalyp jatqyzylǵan. Jerleý ornynan 6 keramıkalyq ydys pen ústine pyshaq qoıylǵan maldyń súıekteri anyqtaldy. Sondaı-aq bas súıeginiń sol jaǵynan qola aına tabyldy. Bas súıektiń ústinen áshekeı bolýy múmkin altyn folga qaldyqtary arshyldy. Baǵaly tastarmen kómkerilgen altyn syrǵa da bas súıek qorapshasy janynan tabyldy. Taǵy da altyn monshaq bóligi alyndy. Máıit uzynynan sozylyp jatyr, onyń aıaq súıekteri saqtalmaǵan. Sondaı-aq oń qol saýsaqtarynyń tusynan saqtarǵa tán akınak (qanjar) tabyldy. Temir akınaktyń uzyndyǵy 30 sm, sonymen qatar qynaptyń altyn jabynynyń qaldyqtary da anyqtaldy. Eki saýsaqty ustaǵyshy men sýaǵary bar keramıkalyq ydystardyń biri Úısin dáýiriniki bolýy yqtımal.