Batys Qazaqstan oblysy, Bórli aýdany, Aqbulaq aýylynda kóktemgi sý tasqynynan zardap shekken 6 otbasyǵa úı berildi, dep habarlaıdy Egemen.kz.
Aqbulaq aýylynda mamyr aıynda bastalǵan qurylys jumystary aıaqtaldy.
Baspanaly bolǵandardy quttyqtaǵan oblys ákimi Narıman Tóreǵalıev Memleket basshysynyń kez kelgen tótenshe jaǵdaı kezinde zardap shekkenderge ýaqtyly kómek kórsetýge erekshe mán berip otyrǵanyn atap ótti.
«Qıyn jaǵdaıǵa qaramastan, tózimdilik tanyta bilgen turǵyndarǵa alǵysymdy aıtamyn. Úıler qysqa merzimde ári sapaly salyndy. Bul, árıne, qýantady.», dedi oblys ákimi.
Qıyn kezde qol ushyn sozǵan ákimdikke óz kezeginde baspanaly bolǵandar rızashylyqtaryn aıtty.
Aıta ketelik, kelesi aıdyń ortasyna taman Bórli aýdanynyń 3 aýylynda taǵy 10 úıdiń qurylysy aıaqtalmaq.
Bórli aýdany ákimdiginiń málimetinshe, 175 ótinish boıynsha múlikter baǵalanyp, qorytyndy shyǵarylǵan. Sondaı-aq «Amanat» partııasy «Aqjaıyq» qory arqyly zardap shekken 93 adamǵa 41 mln teńge bólgen, al «Qyzyl jarty aı» qoǵamy 177 otbasyna 96 mln teńgeniń járdemin bergen. Sonymen qatar aýdan ákimdigi tarapynan 31 mln teńge kóleminde bir jolǵy áleýmettik kómek berilgen.