Semeı qalasynda Abaı eskertkishine gúl shoqtaryn qoıý rásimi ótti, dep habarlaıdy Egemen.kz.
Uly aqyn, aǵartýshy Abaı Qunanbaıulynyń eskertkishine ǵalymdar, qoǵam qaıratkerleri, zııaly qaýym, depýtattar, jastar gúl shoqtaryn qoıdy. Saltanatty sharaǵa Abaı oblysynyń ákimi Nurlan Uranhaev qatysty.
О́ńir basshysy bul shara uly tulǵaǵa taǵzym etý ǵana emes, el tarıhynda baǵa jetpes mura qaldyryp, óshpes iz qaldyrǵan aqynnyń ómiri men shyǵarmashylyǵyn nasıhattaýǵa da qurmet kórsetilip otyrǵanyn atap ótti.
«Zamanalar aýysyp, dúnıe dıdary, kúnde ózgerse de, halqymyzdyń Abaıǵa degen, qurmet sezimi, esh kemimeıdi! Úkimettiń qaýlysymen belgilengen osy kún de – sonyń aıǵaǵy. Aqynnyń mol murasy – baǵa jetpes, rýhanı asyl qazynamyz bolyp qala beredi. Qalyń elin, qaıran jurtyn «jeti qarańǵy túnde» adastyrmaı, «bes dushpannan» boı sýytyp, «bes asyl iske» asyqtyrǵan Uly Abaı – týǵan halqymen máńgi jasaıdy! Sebebi – osynaý almaǵaıyp zamanda, súıenerimiz de, tabynarymyz da – Abaı!», dedi oblys basshysy.
Esterińizge salsaq, Memleket basshysy Qasym-Jomart Toqaev óziniń «Abaı jáne HHI ǵasyrdaǵy Qazaqstan» atty maqalasynda Abaı murasy - ult bolyp birlesýimizge, el bolyp damýymyzǵa jol ashatyn qasterli qundylyq ekendigin atap ótken bolatyn. Osylaısha 10 tamyz búkil Qazaqstanda «Abaı kúni» bolyp belgilengeni málim.
Aıta ketelik, merekege oraı 8 tamyzdan bastap Abaı oblysynyń barlyq qala men aýdandarynda 50-den astam mádenı-tanymdyq is-sharalar ótkizilýde.