Qyrǵyz Respýblıkasynyń Sholpan ata qalasynda «Makin Asia» III halyqaralyq festıvali uıymdastyryldy. «Rýhorda» mádenı ortalyǵynda ótken ánshiler baıqaýyna Mádenıet jáne sport mınıstrliginiń yqpalymen, oblys ákimdiginiń qoldaýymen Kenen Ázirbaev atyndaǵy oblystyq fılarmonııanyń solısi Aına Qalmaǵanbetova qatysyp, jeńispen oraldy.
Úsh kúnge sozylǵan óner dodasyna Majarstan, Túrkııa, Bosnııa jáne Gersegovına, Bolgarııa, Slovenııa syndy elderdiń ókilderimen qatar Azııa memleketteriniń de úkili úmitteri qatysyp, ónerin ortaǵa saldy. Jalpy, 18-35 jas aralyǵyndaǵy 17 jas oryndaýshy topqa túsip, jeńistiń bıik tuǵyrynan kórinýge umtyldy.
13 memlekettiń ánshisi synǵa túsken, Ystyqkól jaǵasynda ótken baıqaýdyń alǵashqy bóliminde jambyldyq jas ánshi A.Qalmaǵanbetova Tólegen Muhamedjanovtyń «Qus joly» ánin shyrqap, Ystyqkól jaǵalaýyna jınalǵan jergilikti ónersúıer qaýymnyń zor yqylasyna bólense, baıqaýdyń ekinshi kezeńinde Erık Karmenniń áıgili «All by myself» ánin óte joǵary deńgeıde oryndap, qazylar alqasyn tańǵaldyrdy.
Baıqaý qorytyndysynda áýlıeatalyq ánshiniń kásibı oryndaýshylyq sheberligin joǵary baǵalaǵan qazylar alqasy Aına Qalmaǵanbetovany bas júldege laıyq dep tanydy. Qysqasy, ol óner dodasynda jeńimpaz atanyp, 5 myń AQSh dollarynyń sertıfıkatyn ıelendi.
«Makin Asia» mýzyka festıvali alǵash ret 2013 jyly uıymdastyrylǵan bolatyn. Atalǵan baıqaýda búginde ataǵy jer júzin sharlaǵan Dımash Qudaıbergen top jarǵan. Úshinshi ret ótkizilgen halyqaralyq festıvalda ekinshi márte qazaq ánshisiniń jeńiske jetýi zor tabys ekeni daýsyz.
Taraz