Almaty oblysyna jumys saparymen barǵan Prezıdent aýyl sharýashylyǵy taýarlary men qurylys materıaldaryn óndirýshilerdiń kórmesin aralady. Memleket basshysyna otandyq qurylys materıaldarynyń kóptegen túri kórsetildi, dep habarlaıdy Egemen.kz Aqordanyń baspasóz qyzmetine silteme jasap.
«Qazaqstanda ónerkásiptik jáne azamattyq nysandar qurylysynyń tolyq sıklin qamtamasyz etetin taýarlar óndiriledi. Atap aıtqanda, kóldeneń jelimdelgen aǵash, qurama temirbeton jáne beton qurylǵylary, avtoklavty gazobloktar, talshyqty sement plıtalary men shyny maqta, qurǵaq qurylys qospalary men árleý materıaldary, boıaýlar men jabyndylar, alıýmınıı profılderi, panelder, dıodty shamdar, esik tutqalary jáne basqa da ónimder shyǵarylady. Memleket basshysy qurylys salasynyń jaı-kúıi týraly aıta kele, atalǵan salany ekonomıkany damytýdyń qozǵaýshy kúshi retinde atap ótti. Kórmege 20-dan astam qazaqstandyq taýar óndirýshilerdiń, sonyń ishinde «Shın-Laın» JShS, Dinara Group agroholdıngi, «Dáýlet-Beket» JShS, «PK Altyn Taǵa» JShS, «Fırma-Bent» JShS, «Knaýf Gıps Qapshaǵaı» JShS jáne basqa da iri kompanııalardyń ónimderi qoıyldy», delingen habarlamada.
Memleket basshysy kórmeni aralap kórip: «Qazir qurylys salasy boıynsha óńirdiń aldynda aýqymdy mindetter tur. Atap aıtqanda, oblys ortalyǵynyń qurylysy jáne G4 City jobasy. Bul jumysta jergilikti ónim óndirýshilerdiń qurylys materıaldarynyń áleýetin barynsha paıdalaný mańyzdy. Memleket otandyq ónim óndirýshilerdi qoldaıdy. Bul týraly men óz Joldaýymda naqty aıttym», dedi.