Memleket basshysy Qasym-Jomart Toqaevtyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda aıqyndalǵan mańyzdy strategııalyq mindetter men tereń maǵynaly qundylyqtar qataryna kóptegen ózekti jáne mańyzdy másele endi.
Dástúrli Joldaýdyń bıylǵy basymdylyǵy ekonomıkalyq máseleler ekeni kezdeısoq emes. О́ıtkeni elimizdiń materıaldyq negizderi pármendi damý jolyna túse almaı keledi jáne onyń áleýmettik-ekonomıkalyq qurylymy áli kúnge deıin tolyqtaı jańǵyra alǵan joq. Jylý stansalaryndaǵy jarylystar, tozyǵy jetken tehnıkanyń jańalanbaýy, bıýdjettiń tıimsiz paıdalanýy sııaqty derekter Joldaýda zamanaýı kezeńniń ashy shyndyǵy retinde jarııalandy. Bul jerdegi synı taldaýdyń túpki astary bizdiń qoǵamdy órkenıetti elderdiń qataryna qosý ıdeıasy jatyr. Sonymen qatar Memleket basshysy burynǵy jyldary ústirt qana atalyp ótetin sý problemasyna jańasha kózqarasty qalyptastyryp, sý saıasatyn júrgizýdi usyndy. Bolashaqta elder arasynda sý máselesi memleketaralyq qatynastardyń mańyzdy qyryna aınalatyndyǵy bıyldyń ózinde erekshe sezile bastady.
Prezıdent «Ádiletti Qazaqstan» men «Adal azamat» sııaqty uǵymdardyń qoǵamymyzda basymdyq tanytýǵa tıis ekenin aıta kelip, jastar arasyndaǵy kreatıvtilik, mobıldilik, ashyq suhbatqa daıyndyq sııaqty qasıetterdiń keńinen taralýyna nazar aýdardy. Qazirgi kezeńde álde de sheshimin tappaı otyrǵan problemalardyń qataryna kásibı bilimniń óndiriske paıdasyn tıgize almaı kele jatqanyn jatqyzýǵa bolady. Joǵary oqý oryndary men óndiris oryndary arasynda ózara seriktestikke negizdelgen shynaıy, adal jáne ádil qatynastar ornamasa, qoǵamdaǵy, ekonomıkadaǵy pármendi damýǵa, jańǵyrý men jańarýlarǵa qol jetkize almaımyz. Osy sıpattaǵy sapalyq jáne sandyq kórsetkish oqý ornynyń mańyzdylyǵy men qarjylandyrýyn anyqtaýǵa tıis. Túrli deńgeıdegi basshy mamandardyń jeke jaýapkershilikterin arttyrmaı, aıtqan sózi sol aıtylǵan jerde qalýy da múmkin.
Memleket basshysy «Halyq únine qulaq asatyn memleket» tujyrymdamasyn naqty iske asyrýymyz kerek» degendi buryn da aıtty. Bul qaǵıdany Prezıdenttiń ózi ǵana júzege asyrmaıdy. Sondyqtan aımaqtyq deńgeıdegi osy tetiktiń jumys isteý qabileti men nátıjeleri únemi baqylanyp, esep berilip otyrylýǵa tıis. Demokratııanyń aıqyn kórinisi aıshyqtala túsýi qazirgi kezeńde óte mańyzdy. Sebebi, biz «Ádiletti Qazaqstan» men «Adal azamat» uǵymdaryn erekshe qundylyqtar retinde dáripteý arqyly ǵana órkenıetti eldiń qataryna qosyla alamyz.
Serik NURMURATOV,
Fılosofııa, saıasattaný jáne dintaný ınstıtýty fılosofııa ortalyǵynyń dırektory