«Aýyldyń ajary – azamatynan» degen sóz bar. Bul – eńbegimen eldi kórkeıtip, kópke septigin tıgizip júrgen azamattarǵa qarap aıtylatyn sóz. Sondaı sıpatqa laıyq azamattyń biri – Beıbit Asanov.
1999 jyldyń 9 naýryzynda Báıterek aýdanynda «Asan-Aýyl» jaýapkershiligi shekteýli seriktestigin qurǵan Beıbit Batnııazulynyń bastamasy búginde úlken sharýashylyqqa aınalyp, aýyl-aımaqqa sharapatyn tıgizip otyr.
Atakásipti alǵa súıregen isker azamat osynaý ýaqyt aralyǵynda eginshilikti qolǵa alyp, ájeptáýir deńgeıge kóterdi. Qazirgi kezde bul sharýashylyq 61 adamdy jumyspen qamtyp otyr. Tehnıkalary aıtarlyqtaı jańaryp, tirliktiń qarqynyn kúsheıtip keledi.
7 vektor kombaıny, K-700 alyp traktorlarymen qosa Mtz-80 markaly 16 traktor sharýany shyr aınaldyryp tur. Búginde sharýashylyq 2 345 gektar jerge kúzdik qara bıdaı egip, ár gektardan 23 sentnerden ónim aldy. Buǵan qosa 200 gektar jerge arpa egip, ár gektarynan 14,5 sentnerden ónim tústi. Bul iste 43 jumysshy eginjaıda tynbaı eńbektenip, altyn dándi qambaǵa jetkizdi.
Sonymen qatar Beıbit Batnııazulynyń sharýashylyǵynda 1 120 gektar jerge jazǵy aq bıdaı tuqymy da sebilip, gektary 12 sentner ónim berdi. Al 1 417 gektarǵa egilgen kúnbaǵystan 16 sentner ónim alýdy kútip otyr. Eldi mekenge qaıyry tıip otyrǵan osyndaı sharýany qolǵa alatyn bastamashyl azamattyń kóp bolǵany – elge paıda.
Rafhat Halelov
Batys Qazaqstan oblysy,
Báıterek aýdany