Qazir geosaıasattaǵy tektonıkalyq múddeler qaqtyǵysy, ózgerister bolyp jatqan zamanda memleketimiz teńgermeli, tejemeli, elep-ekshegen syrtqy saıasatty júrgizip kele jatqany belgili. Biz jer qoınaýy shıkizatqa da baı elmiz. О́ndiriske, ekonomıkaǵa qajetti degen eń mańyzdy strategııalyq resýrstardyń belgili bir bóligi memleketimizde shoǵyrlanǵan.
Osy teńgermeli tejemeli, pragmatıkalyq saıasatty júrgize otyryp, ulttyq múddemizdi halyqaralyq arenada saýatty júrgize bilý mańyzdy. Árıne, bul rette álemniń barsha elimen qatar AQSh-tyń da ózindik orny bólek. Dóńgelek ústel basyna jıylyp, máselelerdi ashyq aıtý, talqylaý jáne ony dıplomatııalyq jolmen sheshýge umtylý barlyǵyna tıimdi. Sebebi jahandaný zamanynda barsha eldiń ekonomıkasy ózara bir-birimen tyǵyz baılanysty. Tipti kólik logıstıkasynan bastap ózge sektorlardy sóz etsek te, memleketter bir-birimen dıplomatııalyq arnalar arqyly tıimdi saıasat júrgizýge múddeli.
Prezıdent Qasym-Jomart Toqaev Joldaýynda «Kólik-logıstıka salasyn qarqyndy damytý – strategııalyq mindet. Úsh jyl ishinde onyń ishki jalpy ónimdegi úlesi keminde 9 paıyzǵa jetýge tıis. Ol úshin salany tıimdi basqarý óte mańyzdy» degen edi. Osyǵan oraı Memleket basshysynyń AQSh-qa issapary aıasynda QTJ men «Wabtec» kompanııalary arasynda strategııalyq yntymaqtastyq týraly negizdemelik kelisimge qol qoıyldy. Osylaısha, kólik-logıstıka salasyna shamamen 1 mıllıard dollar ınvestısııa tartyldy. Bul – Transkaspıı halyqaralyq kólik baǵdaryn damytýǵa yqpal etedi jáne basqa da ınfraqurylymdyq jobalar úshin negiz bolady. Osy sekildi ózge de salalarymyz bar. Máselen, aýyl sharýashylyǵy, jasandy ıntellekt, IT tehnologııa, taǵy basqalary.
Bizdiń alǵa qoıǵan maqsatymyz úlken. Mysaly, Memleket basshysy Joldaýda 2026 jylǵa qaraı IT-qyzmetteriniń eksportyn 1 mlrd dollarǵa deıin jetkizýdi tapsyrǵan. Árıne, bul salada úzdik memleketterdiń biri – AQSh. Olardyń tehnologııaǵa baǵyttalǵan ýnıversıtetteri, bul saladaǵy óndiristik bazasy, ǵalymdary álemdegi eń úzdikterdiń biri dep aıtsaq bolady. Endi aldaǵy ýaqytta atalǵan baǵytta bizdiń joǵary oqý oryndarymyz, kompanııalarymyz seriktestik ornatady degen senim bar. Osyndaı máselelerdi taldaı kele, elimiz kópvektorly, teńgermeli, tejemeli, pragmatıkalyq, ǵylymı negizdelgen syrtqy saıasatyn júrgize otyryp, memleketimizdiń múddesin saýatty qorǵap kele jatyr deýge tolyq negiz bar.
Baýyrjan SERIKBAEV,
Qazaqstan qoǵamdyq damý ınstıtýtynyń sarapshysy