Qazirgi zeınetker muǵalimderdiń eńbek joly tehnıka men ǵylymnyń jetispegen kezinde ótti. Ony qazirgi 65-70-ten asqan muǵalimderdiń bári basynan ótkerdi. Qara taqta, kitap-dápter, bor men kórsetkish taıaqtan ózge eshteńe joq edi. Kúndiz otyrmaı, túnde uıyqtamaı, kórnekilikti qoldan jasap eńbektendi.
Sonyń biri – ózim. Mańǵystaý aýdany Qyzan aýylyndaǵy Á.Jangeldın atyndaǵy orta mektepte taban aýdarmastan 45 jyl ustazdyq ettim. Onyń 11 jylynda tárbıe isi jónindegi orynbasar, 7 jylynda mektep dırektory qyzmetinde boldym. Sol kezdegi aılyq jalaqynyń ózi qazirgishe eseptegende 100 myń teńgeniń kólemine jeter-jetpes edi.
Qazir oblysta, aýdanda ártúrli merekelik is-sharalar, aıtýly kúnder, túrli jıyn-jınalys ótedi. Bulardan qala men aýdan basyndaǵy zeınetker ustazdar bolmasa, aýyldaǵy ardager, zeınetker ustazdar qalys qalady. Bıylǵy jazda Aqtóbe oblystyq bilim basqarmasy 250 ustazǵa Tarazdyń «Merki» shıpajaıyna tegin joldama berdi. Aqtóbege qaraǵanda Mańǵystaý «qara altynǵa» shomylyp otyryp, mundaı ıgilikti is jasaı almaı otyr. Aldaǵy ýaqytta da ákimder men aǵartý salasynyń basshylary oılanar, oılanar da qolǵa alar dep úmittenemin.
Men byltyr jáne bıyl Aqtóbeniń Mártók aýdany «Zárý» shıpajaıyna 500 myń teńgege demalyp keldim. Onda da zeınetaqymdy birneshe aı jınap bardym. Jyl saıyn qazan aıynda toılanatyn Ustazdar kúni merekesi – biz úshin «jabyq dúnıe». Aýyl, aýdan, oblys basshylarynyń eń bolmaǵanda biraýyz jyly sózi de joq. «Qaınaıdy qanyń, ashıdy janyń» dep áýlıe Abaı dál aıtyp ketipti-aý...
Jetkinshek Áýelbaıuly,
ardager ustaz
Mańǵystaý oblysy,
Mańǵystaý aýdany