Osydan 20 jyl buryn, 2003 jyly 23-24 qyrkúıekte Astana qalasynda alǵash ret Álemdik jáne dástúrli dinder kóshbasshylarynyń I sezi ótti. Sezdiń maqsaty – dinderdiń álemdik jáne dástúrli nysandarynda jalpyadamzattyq baǵdarlardy izdeý, dinder dıalogin júzege asyrý jáne kelisilgen sheshimderdi qabyldaý úshin halyqaralyq konfessııaaralyq ınstıtýtyn qurý boldy.
El basshylyǵynyń bastamasymen ortaq múddeler men ózara túsinistik negizinde qurylǵan álemdik jáne dástúrli dinder lıderleri arasyndaǵy dıalog ózara yntymaqtastyq úshin keń perspektıvalar ashady. Sondaı-aq zamanymyzdyń zorlyq-zombylyq, fanatızm, ekstremızm jáne terrorızm sııaqty jaǵymsyz kórinisterin eńserýge yqpal etedi.
Álemdik jáne dástúrli dinder kóshbasshylarynyń I sezinde forýmǵa qatysýshylar sezdiń jumys organy – Hatshylyqty qurý týraly sheshim qabyldady. Sezd hatshylyǵynyń basshysy Parlament Senatynyń tóraǵasy, sezge qatysatyn álemdik dinder lıderleriniń ókilderi, onyń ishinde ıslam, hrıstıan, ıýdaızm, býddızm, daosızm, sıntoızm, ındýızm, halyqaralyq uıymdar ókilderi – músheleri bolyp bekitildi.
Aldaǵy 11 qazanda Álemdik jáne dástúrli dinder lıderleriniń birinshi seziniń shaqyrylǵanyna 20 jyl tolýyna oraı sezdiń XXI hatshylyǵy ótedi. Osy jyldar ishinde Astana konfessııaaralyq forýmy dinaralyq dıalogtiń basty halyqaralyq alańdarynyń biri ekenin dáleldedi. Hatshylyqtyń aldaǵy otyrysynda sezdiń jumysyn uıymdastyrý jáne onyń mazmundy bólimderi jónindegi máseleleri talqylanady. «2023-2033 jyldarǵa arnalǵan Álemdik jáne dástúrli dinder lıderleri sezin damytý tujyrymdamasy» atty mańyzdy qujat qabyldanady. Bul tujyrymdama 2022 jyly ótken VII sezd bastamalarynyń biri boldy. Sezderdiń erekshe jaýapkershilikpen usynylǵan bastamalary shyn máninde júzege asyrylyp, álemde tózimdilik, dıalog jáne túsiný qaǵıdattaryn ilgeriletýge qyzmet etedi. О́tetin otyrystyń kún tártibi boıynsha jemisti pikir almasý kútilip otyr.
Osy forýmnyń taǵy bir mańyzdy sáti – is-sharanyń eriktileri retinde JOO stýdentteriniń qatysýy bolmaq. Belsendi jastar forým jumysyna árdaıym qyzyǵýshylyq tanytyp, qatysqysy keledi, sheteldik delegasııalarǵa kómektesedi, aýdarmashy bolady. Shyn mánisinde sezdiń ıdeıasy – dıalog pen ózara kómekke baǵyttalǵan.
Janar QASYMOVA,
Konfessııaaralyq jáne órkenıetaralyq dıalogti damytý ortalyǵy jıyntyq-taldaý departamentiniń dırektory