Rejısserler Aısultan Seıitovtiń «Qash», Darhan Tólegenovtiń «Aǵaıyndy», Ashat Kýchınchırekovtiń «Baýyryna salý» kartınalary «Azııalyq Oskar» (Asia Pacific Screen Awards) syılyǵyna úmitkerler qataryna kirdi.
Aısultan Seıitovtiń týyndysy «Úzdik fılm» jáne «Úzdik operatorlyq jumys» syndy eki atalymda usynylǵan. Basty atalymda Japonııadan, Qytaıdan, Grýzııadan kelgen eńbektermen talasqa túsedi. Olardyń arasynda bıylǵy Venesııa kınofestıvalinde Qazylar alqasynyń arnaıy júldesiniń ıegeri atanǵan Rıýsýke Hamagýtıdiń «Zulymdyq joq» atty týyndysy da bar.
Al Darhan Tólegenov pen Ashat Kýchınchırekov eńbekteri «Úzdik rejısser» jáne «Úzdik jastar fılmi» atalymdaryna ilikti. Tólegenov qatysqan atalymda joǵaryda aıtylǵan Hamagýtı men 2023 jylǵy «Sandens» jáne Berlın kınofestıvalderiniń qatysýshysy Selın Son da baq synap otyr. Sondyqtan tartysty báseke bolǵaly tur. Otandyq úsh kartına rejısserlardyń debıýttik jumystary.
«Qash» fılminde qazaq dalasyndaǵy 30-jyldardaǵy asharshylyq kezindegi halyqtyń mehnatty aýyr taǵdyry kórsetiledi. Qabir qazýshy Isataı óz aýylyn qutqarý úshin qaýipti mıssııaǵa barady. Biraq jolda kezbe adam kezdesip, ony týra joldan adastyrady.
Aıta keteıik, Aısultan Seıitov jazda Shanhaı halyqaralyq kınofestıvalinde osy jumysy úshin «Úzdik rejısser» atalymyn jeńip alǵan bolatyn.